本報日前接獲匿名舞蹈員投訴，話曾經同譚小環拍過拖，為郭富城、陳慧琳等巨星排過舞嘅排舞師SunnyWong拖欠舞蹈員人工幾年，數目過百萬，又話做舞蹈員平時遲出糧兩、三個月都算好彩，出唔到糧嘅job有好多，其中以Sunny唔出糧嘅情況最嚴重，但Sunny就成日換車兼晚晚蒲，着親都係名牌，但永遠就話自己冇錢，遲啲先出糧，因為舞蹈員呢個行頭好細，Sunny又最多job接，所以佢哋焗住要做，而接job又冇合約白紙黑字寫明，如果企出嚟投訴，驚以後冇得撈。
否認換車
馮仁昭噚日就事件搵Sunny問清楚，身處內地嘅佢話𠵱家有成60個舞蹈員跟佢搵食，佢喺電話講話：「𠵱家進行緊嘅啦，啲數好難一次過畀，會分幾期出，我一定會找數，我喺呢行做咗成20年，叫佢哋唔使擔心，我呢期只係周轉緊，下個月會出糧畀佢哋。」Sunny仲否認自己呢排有換新車，佢話：「我唔係換車，佢哋見到我嗰架新車，係朋友嘅車，唔係我嘅。」
