呢排天氣陰晴不定，久唔久仲會行雷閃電落大雨，揸車人士要更小心！
話說悠穎馳早兩日揸車返工，嗰朝因為大雨唔敢開得快，經過龍翔道近龍翔中心對開，見前面有車慢駛所以老早打定死火燈收慢，點知後面部貨車跟得好貼，聽到佢踩Brake踩到響晒胎，個尾仲輕輕掃咗過隔籬線，嚇到行車線入面嗰部的士即刻扭軚避開，好在嗰時大家都避到，如果唔係我諗自己喺醫院瞓緊囉！
有時見到啲人好似舒密加上身咁，以為自己係車手，無論揸私家車定大貨車，都表演左穿右插、逢車過車、見車必推……好危險；而且有關當局，早已叫大家揸車嗰陣無時無刻都要同前車保持兩秒距離，而喺下雨天嘅情況下，更應將距離加多一倍，因為濕滑嘅路面令輪胎嘅對地抓着性減低，而制動距離亦會因此增多，故此大家必須時刻謹記保持最少兩秒距離！
悠穎馳
豪邁不羈，愛車如命，聽幾下引擎聲就知咩車！