如果話濱崎步拉隊來港拍MV係大陣仗嘅話，咁阿Net就覺得韓國嘅MV更加架勢，最近有位回歸樂壇嘅男歌手JED，就搵咗韓劇《大話妹》李東旭同男演員陳玖，拍咗個電影感十足嘅新歌MV，不過喺預告片段入面，有好多搞笑嘢，李東旭除咗做人老竇外，仲有一幕天台講數兼用槍指住陳玖嘅場面，十足《無間道》翻版。
唱歌化解戾氣
JED首歌《在愛的森林裏迷失方向》下月先至推出，但唱片公司一早公開呢個拍到成部電影咁嘅MV預告片同製作特輯，呢種宣傳伎倆喺韓國好常見，最近有網友將呢啲片段擺上網。李東旭喺MV度扮差人，可惜愛女俾人綁架，為咗救佢，李東旭不惜變身野蠻差佬，將啲壞人打餐懵，之後仲同懷疑係內奸嘅差人陳玖喺天台講數，李東旭用槍指住陳玖個頭，同時又勁擺唔知點好嘅懊惱表情，呢幕戲就擺明抄《無間道》啦。
喺製作特輯入面，大家睇到李東旭每個動作都親身上陣，阿Net都覺得佢好man。至於女童星嘅唱歌表演，就為呢個幾暴力嘅MV化解唔少戾氣。
MV預告
網址： http://www.youtube.com/watch?v=ciPr2FPaWLs
MV製作特輯
網址： http://www.youtube.com/watch?v=33CUh7hO8rw
版主：阿Net
本欄逢周一至五刊出