論近期至Hit蒲點，首推九龍灣超大型商場megaBOX，佢有全港最大傢俬舖B&Q同大型家品店Spotlight，至啱鍾意行街同掃貨嘅我！唔想排長龍爭搭穿梭巴，又或驚兩手拎滿戰利品嘅人，梗會自己揸車去。本來成千個車位唔驚無位泊，不過我同好多姊妹一樣，泊位技術麻麻，擔心個場多柱又難泊。好彩實戰過後，連我都可快速搵到位兼泊得四四正正，只係某啲車位較騎呢同危險。今日就捉晒佢哋出嚟，等姊妹們可以安心揸車去掃貨。
記者：梁美甜
協力：鄭達基
攝影：陳陶鈞
模特兒：Algie（TheGroup）
泊位實戰
姊妹放心！車位闊 10秒內泊好
去megaBOX最方便莫過於可以望住幢商場揸過去，去到門口大把工作人員指示你邊度落客或上停車場，搵停車場入口話咁易，沿住特快車道就可由地面直上16樓，幾個彎就到唔會轉到頭暈。
放眼望去大部份車位都係L位，兼且車道又闊落，壓迫感小泊起車嚟信心都會大啲！事實證明我係啱嘅，事關車版大師兄只係短短十秒，就泊到架車四四正正，我技術咁渣亦只係十零二十秒搞掂，各位雪藏牌或SundayDriver姊妹唔使驚啦！想近客𨋢記得泊每層入口轉彎之後嘅右手邊，尤其15、16兩層，全層停車場，右手邊有幾個出入口方便到暈！
小心騎呢陰濕位
夏日炎炎，若果唔想愛驅俾太陽勁曬又或俾雨撇到濕晒，咁就要避開每層停車場入口、轉彎後左手邊一大排車位喇，事關佢幾開揚，雖則可以睇風景但就同樣受到太陽同暴雨嘅關照；焗住要泊嘅話就記得車尾入唔好曬親個車頭喎！
咁大個停車場梗有陰濕位，好似14樓個尾彎就要小心啲過，尤其係車身較大就更要小心！7樓同14樓有啲車位都要注意，喺正出入口不時有人行過之外，前後都有柱有躉，而且係S位，都幾蝦人泊㗎！15樓入口嗰兩個車位更加係高難度，事關全部車都喺嗰度出入，唔夠位之餘仲好易刮花，所以商場都暫時性封咗兩個位，算幾細心！
megaBOX車場實用資料
總共7層提供時租車位，分別係地庫、L7、L8、8M、L14-L16。唔想泊地庫，就要直上L7至有位；地庫、L15及L16全層都係停車場，每層過百車位，較易搵位同泊車。
至於想Shopping就要泊8M或以下，事關全部大型商舖都集中喺L10或以下，由L10開始就係食肆，想搵食可以直上L14泊低部車先！
車場優劣參半3讚vs3彈
囗直上16層 毋須左兜右轉
停車場有條所謂「特快車道」，雖然個名有啲取巧但勝在構思夠體貼，直路多唔似其他停車場咁，要逐層左兜右轉，一條氣就可直達L7時租車場。不過有唔少泊過megaBOX嘅車主，都認為直上反而會頭暈，好唔好真係見仁見智喇。
囗每層有迎賓 唔會搵到暈
現時每層都有迎賓（工作人員），指示你嗰層有無車位，唔使估估吓逐層搵位；稍後電子顯示板將加入運作，有冇位一望就知，更方便！計劃中仲有部「搵車機」，一刷卡就可以Check到你部車泊咗喺邊層邊個位，啱晒如我般泊完就失憶嘅大懵人！
囗車場換飛仔 免費佢有計
除咗L10同地下有固定客戶服務台，俾大家換免費車飛外，每逢星期六、日及公眾假期，megaBOX仲會喺人流特別多嘅樓層設流動服務台俾顧客換飛仔，分別置於L5、L13同L15。由即日起L3嘅流動客戶服務台仲會取消而改喺L13設置一個固定嘅客戶服務台，事關每日最多人換免費車飛嘅就係由L13起嘅茶客，所以擺番個服務台喺度，唔使大家騰嚟騰去，算體貼嘅做法，抵讚！
囗尊貴車位 居然唔方便
每層有兩個VIP車位，呢期係擁有恒生卡同megaBOX聯營卡顧客就可以泊，之但係門口「迎賓」阿姐同將來電子顯示板，都唔會話你知個位有無人泊咗，一定要自己兜圈睇一睇；就算有位都要叫工作人員幫你移開Reserved物品，尊貴得咁嘥時間，泊普通位無咁嬲！
囗傷殘車位 唔係層層有
傷殘人士車位只設於L14-L16三層，每層僅得一個，仲好高層數，位置亦比較入，要轉一兩個彎先至到個特定車位，絕對唔夠UserFriendly。
囗大件貨上落 唔夠方便
唔好以為買得嘢多會有手推車俾大家推去停車場，事關megaBOX覺得手推車危險，不准使用！如果你去B&Q買大件傢俬嘅話，B&Q會安排顧客停喺專用車位，仲會一早推定啲貨出嚟等你Pick-up㖭！至於其他商舖，買得多嘢就閣下自理囉！
泊車要有卡 現金用唔着
megaBOX停車場只收卡，包括八達通同Visa、Master兩類信用卡，只要喺商場入面消費，憑商舖機印收據就可去客戶服務台換3小時免費泊車飛，行街食飯都夠時間！若然過咗3個鐘就每半個鐘$4計（同咪錶一樣）。切記唔好以為Cash大晒，話說現時好多停車場均已轉用卡嚟計數，無嘅話都幾頭痛！
附近好選擇：2蚊1粒鐘至抵玩
若然megaBOX爆棚，大可去對面宏豐道露天車場，每粒鐘$6（兩小時起計），但會隨繁忙時間而調節價錢，勁搞鬼！亦可選擇遠少少嘅南豐商業中心或者九展；南豐商業中心星期一至六、上午8時至晚上9時每半個小時收費$2，最抵係晚上9時後低至$2一小時，代價係要行遠幾步！至於九展就每小時收$12，若然你喺地下至6樓嘅Emax消費，每$100就有一小時免費泊車，最多3小時，算係咁喇！
港九新界教你行
要揸車到megaBOX逛一啲都唔難，無論你住喺新界九龍又或者港島都好，只要認住幾個關鍵重點就好易搵到。
路線1 紅隧、尖沙嘴方向經啓德機場隧道
啓德機場隧道出之後轉入九龍灣，由啓祥道經宏光道轉入常悅道，左轉入常怡道再轉入臨豐街即到。
路線2 新界 經龍翔道
由龍翔道經觀塘道7號幹線東行7B出口出，即啓業邨對出，偉業街天橋見「九龍灣及香港出口」出轉入九龍灣就見到紅色建築，再跟megaBOX指示牌行由常悅道轉入臨豐街就到。
路線3 港島東由東隧出 經觀塘繞道
出東隧後順着觀塘繞道行，2號幹線西行2D出口，轉入九龍灣跟指示牌行至常怡道，右轉入臨豐街就到！
