又講變形金剛？無錯！呢兩個月嚟，變形金剛話題無孔不入！由隱藏電影預告片，到玩具、T-shirt、香港真人版老柯；但電影一日未上，機械設定如何？故事內容講乜？硬係感覺到喉唔到肺！皆因直至現在，大家都唔能夠清清楚楚睇到21世紀3DLook的變形金剛到底係點！心癢癢，終於等到金剛襲擊遊戲界，所有遊戲平台佢玩晒！醜婦終需見家翁，實行喺Game入面一一睇清博派、狂派真面目！
記者：馮冠芝
攝記：伍慶泉、陳盛臣
高清睇機體Details
記者率先試玩XB360版變形金剛，一開機，立刻釣到N個30歲開頭同事圍觀！
電影Trailer雖然有機械人睇，但出到眨吓眨吓唔清楚；電影資料相全部淨出人物、車相；玩具版又出得古靈精怪睇唔清楚！
但《變》喺XB360同PS3玩上1080p高解像，老柯Detail終以高清展現眼前，連佢個胸口以車頭加車門造成，身體上邊條係避震、邊條係死氣喉都睇得清清楚楚，打機如睇戲，未玩已先大飽眼福。
遊戲預言 破電影傳言
遊戲故事基本跟足電影劇情，因此解開咗唔少「電影」傳出嘅謎！話說網上有傳今集以大黃蜂擔正做主角，柯柏文、麥加登只會喺片尾出1、2個鏡頭，屈大家睇第2集！但遊戲就派咗粒定心丸畀大家，柯柏文、麥加登、爵士、星星叫全部會出場，機種多到好似大巡遊一樣！
大黃蜂唔做甲蟲
提到變形金剛又點可以唔講變形？呢方面隻Game都無令Fans失望！玩博派、狂派都會照跟電影原著雙線發展；入面最正係過場動畫會交代故事劇情，好似主角大黃蜂初降落地球一幕，咁蹺見到架黃色跑車，於是有樣學樣化身成跑車，見到呢幕不禁講句：「同舊版電視劇情一樣，但唔再係甲蟲仔；不過亦好彩佢第一眼唔係見到垃圾車！」
變身優先場
有關變形過程，任何地方都冇詳細交代，遊戲裏面亦係優先睇！同電視版一樣，機械人輕輕跳高，再一個鯉魚翻身，一下撻落地就變成車，全程唔使半秒，但過程流暢無偷格，變形只㩒一個掣毫無難度；但玩家需靈活運用，例如追敵人要變車先夠快，打鬥當然要變番機械人先夠力！
博派狂派 雙線發展
基本上XB360同PS3玩法一樣，玩家可以揀做博派狂派，兩邊會有唔同場景及任務，做得忠的博派，就要保護阿Sam及找到火種源（AllSpark）。而做奸仔狂派，就要破壞地球同對付博派，睇落好爽，但打落就發現敵人係美軍同博派兩邊聯手圍攻，都話壞人唔易做！
無論忠定奸，小記最愛係隻Game做得非常Detail！任何場景，如大廈、招牌、警車，同變形金剛都有物理反應互動，好似炸建築物、機械人跳高鋤落地會有個小陷坑，全部即時反應，對遊戲設計的仔細只能寫個「服」字。
遊戲小貼士
做博派咪破壞
做博派，梗係要保衞地球啦！如果你唔小心車死人又拆樓，老柯就馬上Call爆你台；而且仲好似《GTA》咁，當你達5級破壞，全城警車會向你開槍兼圍捕，馬上變成大反派！
解救方法係馬上兜口兜面變做車，警察會完全認你唔到，你嘅破壞指數就變番零！至於受破壞的建築物零件，你隨時可執起手當武器㗎！
跳高轟地打暈人
追逐攻擊方面，提議喺攔截敵人嗰陣，變成機械人跳高再轟落地下，咁就會形成一股暴風，迫敵人變番機械人同你再打過，慳水慳力。
Fans點睇？
阿彬：「玩上手有難度，但都有好多不同Tasks，唔算單調。」
Wilson﹕「XB360畫面超靚，機械人變身過程好清楚，差啲以為睇緊戲！」
Alex﹕「變形金剛𠵱家已經變晒樣，太美國化，所以興趣不大。」
Profile
機種：XB360/PS3/Wii/PSP/NDS
廠商：Activision 種類：動作打鬥
人數：1人（XB360/PS3/Wii）/2-4人（PSP/NDS）
定價：$299(XB360)/$368(PS3)/$268(PSP)/$330（Wii）/$238（NDS）
i-Gamer（27253338）
深水埗福華街福仁商場地下G16/20
DreamStore（25753285）
灣仔東方188商場地下G04舖
