半年結日，港股下跌165點收市，胡主席到港賀回歸，人人話個市升梗，但係就事與願違，呢個故事話畀大家聽「想當然」嘅風險，「馬後炮」講句，大戶散貨嘅最佳時機就係人人話個市會升嘅時候。
比較容易估到嘅，應該係美國聯儲局維持利率不變，但係會後聲明就唔係咁易估，公佈咗嘅內容話樓市繼續跌，經濟慢慢升，但係通脹嘅前景就唔係幾好，咁即係點？唔係好清晰，或者話聯儲局唔係好敢講，點解？加息會踩多樓市一腳，減息就驚美元俾人插，次按嘅危機又越煲越大，伯南克𠵱家都好頭痛，睇嚟7月花旗個市都好亂。仲有就係啲油價升破咗70美元1桶，如果唔快快趣趣跌番落去，或者仲要大幅抽高，咁個市就會亂過亂世佳人，大家下個禮拜都要醒定啲。
港股昨日跌得都幾肉酸，穿頭破腳低收，啲技術指標耷晒落嚟，恒指企喺10日線樓上收市，下個禮拜放假返嚟，如果個市插落嘅話，就要試落去21500，再跌就要試21200支持位。
呢幾日國內有乜嘢消息都會對下個禮拜港股有影響，咁嘅環境都係炒番啲強勢股着數啲，煤股走勢唔錯，可以諗諗。
神華C輪7392：神華（1088）昨收27.30元，逆市上升唔會冇後着，股價升破咗10日線，同隻兗煤（1171）一樣，升得好有氣勢，神華升破咗28.2元，就可以推去32元嗰頭，買番啲7392短炒，隻輪昨收69仙，槓桿率4倍（有效3倍），正股升上32元，7392應該喺1.06元樓上，正股跌穿25.8元就止蝕。