今日中午就會截止公開認購申請嘅安踏體育，消息人士同華華講，喺掛牌嗰日，打緊美國NBA嘅國家隊中鋒姚明，將會出席上市儀式，嚟撐場咁話。鬼咩，佢老闆休斯頓火箭班主LeslieLeeAlexander用咗兩億幾銀入股安踏，梗係想隻股受多啲人注意啦！
話時話，華華都有去過港交所交易大堂上市儀式，雖然個場樓底其實唔係咁高，但係對於標準身形嘅亞洲人嚟講，是絕對綽綽有餘。不過，對身高2.26米嘅姚明，就可能矮咗啲。唔知有關方面有冇提吓姚明呢？華華唔希望嗰日要報道安踏股價表現之餘，又要報道姚明撞親頭。
講開又講，姚明將會喺8月迎娶同樣高人一等嘅中國女籃球員葉莉，唔知今次來港出席安踏上市儀式，會唔會順道喺香港買番啲結婚用品呢？
[email protected]