曾特首與新內閣如果要全力發展香港國際金融中心地位，第一個要務係大力投資於教育，同時改善香港居住環境，主要係在空氣質素方面。外國好多金融精英之情願選擇新加坡，唔嚟香港，主要理由就係子女入國際學校難，除咗債券（debenture）貴之外，申請入學學生等候名單亦太長，此外就係空氣污染嘞。香港管弦樂團總監廸華特將太太與子女搬咗去美國威斯康辛州，就係唔鍾意香港空氣。
至於本地精英就要靠大學培養，特別係研究院方面。有錢有料嘅子弟走晒去牛津劍橋芝加哥讀大學，唔使驚噃，現在大家都望住中國大陸市場，佢哋一定返嚟搵食。問題就係，佢哋讀完學士之後，返到本港讀專業學位，例如金融中心一定渴求嘅公司律師，本地大學能否源源不絕咁供應呢？最近與議員L食飯，聽佢講好多世姪在美國著名大學畢業之後，無論讀邊科，想成為香港律師，在本港執業，一個最快途徑就係入中大或城大讀JD（JurisDoctor）（俗稱法律博士，其實不等同博士學位），再讀PCLL，然後考律師。議員L最初以為佢幾位世姪出身美國名校，英文好掂，考中大JD課程一定考到，誰知不然，入學競爭之激烈，令佢吃了一驚，因為居然有一兩位考唔到也。
學位少，咪考唔到囉，未必關學生嘅事。特區政府為公僕加薪大開綠燈，增加支出五十幾億，但增加大學經費之時，推搪藉口就多咯，例如大學多「肥膏」（唔通公務員系統就冇？），明年就係新一個大學撥款三年期，各界人士不妨注意吓曾特首班子肯增加幾多大學經費。
一位讀者來郵話佢有一位朋友往美國留學，在彼邦成為工程師，工作唔錯，收入幾好。去年想話回港服務，點知搵工困難，工程師牌照不獲承認，搞到好冇癮，讀者問點解？左丁山只能答，專業界嘅保護主義色彩濃厚，以外人不認識本地情況為名，唔畀外來專業人士執業。香港工程師去到美國，相信亦會遭遇同樣情況。