七人車總係畀人一種笨笨感覺，每次揸去街，啲人一係就當你去買餸又或者係合家歡家庭樂，完全想像唔到會揸架七人車去返工去玩去蒲；仲有一般人都覺得七人車又大架又難泊位，對女仔好似我咁一啲都唔好揸，點知原來估錯晒，事關新一代七人車外形討好兼易揸，揸返工去玩都唔老土，而且泊位好Easy，醫番我嘅S位恐懼症，就算去蒲得番細細個S位都唔驚！
記者：梁美甜
攝影：伍慶泉
模特兒：Emily
日產Lafesta不嬲都出名引擎耐用扭力又夠，係就係幾實用，之不過總係覺得佢四正得滯唔夠醒目，點知最新一代嘅Lafesta就嚟個大翻身，將個車頭鬼面罩整大咗仲拉番圓個線條，當堂型番晒，而且頭泵把嘅進氣格大咗之後，可以增加空氣流量兼減低引擎溫度，名副其實有姿勢有實際！尾燈組合同尾泵把都整整佢，兩邊泵把換咗圓形反光板，話夜晚遠一遠嘅車都留意到而增加安全性，但我最鍾意反而係佢嘅尾燈由圓點改咗做橫紋，點睇都無咁老土啦！
內櫳座位頭枕同錶板都做咗手腳，新車嘅頭枕可以校高低之餘仲可以校角度就最啱我，事關我成日頸痛，頭枕位置同角度可以減輕我頸部支撐，舒服好多！
新舊比拼
車頭
車尾
錶板
頭枕
天幕大同級一倍
講真其實咩車都可以揸去shopping返工又或者去wet，之不過可以成班人一齊行動，兼隨時有個大天幕曬日光或月光，同Honey談吓心，仲要架車唔老土就唔係咩車都得喇！
講真，我至冧都係個天幕，你咪話用天幕嚟形容個天窗會唔會誇得滯，若然你挨低晒中後座之後再打開個天窗，你都一定會嘩一聲，事關個天窗真係大到暈，跟同級MPV嘅雙天窗大差不多一倍，塊玻璃仲要巴閉到可以阻隔近95%紫外線同80%太陽熱能㖭！如果隔籬嗰個真係自己Honey就好啦，挨晒落去曬日光都冧爆呀！至於車廂空間就同上代無咩大分別，大過M5就梗㗎啦，而且可以隨需要變動座椅，騰出適當嘅空間想做咩都得！
輕巧易揸泊位無難度
我認，我最渣就係泊位！識我嘅人一定唔需要我泊車，尤其係七人車！但估唔到坐上新一代Lafesta司機位就已經覺得有啲唔同，唔多盲點望嘢好清，原來部車係低腰線廣闊車窗，人坐高咗個窗又好似大咗咁，睇位就容易咗，對我嚟講泊位信心自然大咗；最開心係個軚仲好輕好靈活，原來係部車擁有同級最少迴旋半徑，只係得5.1米，揸喺手都零舍爽，終於都膽粗粗試揸泊S位，哈！打破晒我泊位紀錄，以平時幾分鐘泊位嚟比，今次贏晒！開心到暈！
美甜試泊實錄
泊S位話咁易
日產LafestaDeluxe規格
引擎：1,997c.c直列4汽缸16氣閥CVTC
馬力：137ps/5,200rpm
扭力：20.4kg-m/4,400rpm
傳動：XTRONICCVT電子智能無段變速波箱
驅動：前置引擎、前輪驅動
查詢：合誠汽車23688235