莫文蔚（Karen）連續第二年成為「香港購物節」嘅宣傳大使，佢除咗會代表香港去外地推廣活動外，仲幫手拍咗兩個電視廣告。噚日Karen着住白色透視裝出席喺銅鑼灣舉行嘅記者會，呼籲在港購物。
作為宣傳大使當然要身體力行，Karen表示最愛喺香港shopping，佢話：「我不單止購物節先買，平時都買好多。試過一日喺間鞋店買咗八、九對鞋。我最鍾意買鞋同內衣，間中都會買畀屋企人同朋友。」Karen仲話會買boxer（孖煙囱）畀朋友，佢話：「其實唔止男友（馮德倫），總之朋友，男女都有，唔係貼身嘅boxer，人人都用到。」
着20磅裙無怨
另外，Karen用咗五日拍咗兩個宣傳廣告，去珠寶店、電器店同時裝店取景。旅發局特登搵咗香港名設計師余家安幫Karen設計一條裙拍廣告，呢條人手縫製嘅裙用咗唔同嘅物料，成20磅重，不過Karen着住條裙咁辛苦做嘢都絕冇怨言，十分專業。
