後日就係香港回歸十周年嘅大日子，大粒佬當然要出嚟講兩句，發表吓回歸感受。新鴻基地產郭氏三兄弟，噚日就喺集團網頁出稿慶回歸。華華睇完覺得，篇稿雖然係郭氏三兄弟署名，但內容咁「行」，九成九係公關手筆。
發圍要向外望
其實，新地公關使乜咁辛苦整篇「行貨」，今年初，老二郭炳江喺新地業績記者會上面，《蘋果》記者就問過佢對回歸十年嘅感受，佢回應時句句有point。
好似話到過去十年，香港同中國以至對外國家嘅經濟係越嚟越相連，所以香港以外嘅因素對香港嘅影響，遠遠緊要過香港內部因素，所以香港嘅發展模式亦要向外，所以無論機場、旅遊、商貿、物流等行業都係向外。
佢仲話，香港經濟過往十年已經由靠工業出口，轉為靠服務出口，要靠用腦。至於喺地產界裏面，過往幾年無論則師、室內設計、機電專才，都過晒大海搵食，「我懷疑有百分之五十香港室內設計師已經做緊唔係喺香港裏面嘅嘢。」郭炳江講嘢一向言中有物，亦好有國際視野，佢寄語香港人，要發圍一定要向外望。
[email protected]