王氏港建曲線私有化慘敗收場。噚日議案投票表決，出席嘅獨立股東雖然有近2.24億股，贊成得5985.8萬股；反對有6917.4萬股；冇眼睇投棄權嘅飛，有接近4成咁多。
王氏港建主席王忠桐事後話，私有化作價每股1.65元，對得住天，對得住地，盡晒自己責任，為小股東嘅利益着想。佢話無論結果係點，私有化失敗唔會失望，成功又唔會好高興，總之一年內唔會捲土重來，肯定唔會變身莊家「做好」股價。
王主席仲變身股評家，預測下星期股價由收市前嘅1.45元落返1.3元樓下。佢仲發出多次盈警，話今年首5個月生意額比去年同期跌15%至20%，中期業績公佈，股價更加插水，呼籲有貨者要走。
大股東兼主席插自己間公司，可說是奇聞。但兩次私有化都失敗，仲被揸住709.68萬股嘅「股壇長毛」、港交所獨立董事DavidWebb批評價錢太賤，每股應該值3.16至3.45元，反對硬，要轉軚起碼2.5元先得。Man到爆嘅王主席就話，至憎俾人要脅，寧願一拍兩散。
跌到1毫都唔放
Webb早前預告唔會踩場，但小股東一樣辣。揸住20萬股嘅David崔小股東，炮轟王氏港建06年勁賺2.5億，每股盈利35仙，末期息得1.5仙。佢勁鬧：「毛主席講過，吃虧在於不老實。派息咁少，乞兒都不如，好可恥。」王主席反駁，初時諗住私有化成功，作價較舊年提高，已考慮到派息因素，但死都唔肯應承派番特別息補數。
自分拆上市已長揸1000萬股逾17年、以往供股照跟嘅梁生眼泛淚光講，本身諗住投棄權票，但媒體訪問佢後，決定轉投反對票。佢話，作價1.65元係敵視小股東利益，公司前景唔差，長揸係信念問題，如果股價唔好彩跌到1毫子，就陪佢過世。
[email protected]
