近期一連串有關手機保安問題，令人擔憂；如日前傳出黑莓（BlackBerry）電郵遭到美國國防部截取，而個人嚟講，亦有受害者俾人偷咗部手機後，將機內VideoClip放上網任人欣賞！曾以解Lock一技成名嘅謝利記（Jerry），對解決手機資料防盜有另一套睇法：「幾厲害嘅加密技術，始終有被Hack嘅一日；唯一方法，就好似玩『達文西密碼』，用特別數字、符號或稱謂，代表某種人物及意思，就算真係俾人Hack咗，都唔知內容講乜！」煩就係煩，但原始得來最實際。
記者：陳國輝
攝影：陳盛臣、譚盈傑
Model：Chimpy
BB解釋破解要等20億年！
上星期法國黑莓（BlackBerry俗稱BB）電郵遭截取嘅消息傳出，引起各界政府及私人機構關注；實情，號稱加密技術冠絕全球嘅BlackBerry手機係咪咁不堪一擊？小記就此事訪問咗香港黑莓技術支援部Chris，佢以內置於手機嘅加密標準為例，指出現時所用係最高級嘅加密技術──AES-256Bit，呢樣係乜東東唔重要，Chris解釋，想破解呢串鎖匙，情況同一般解碼咁，要用電腦逐次去嘗試，佢仲引述非官方嘅評估，若然想全部試齊晒，要等20億年先搞得掂！
科技係不斷進步，專家就話冇人會咁蠢用同一套舊設備慢慢進行測試，只要件產品有極佳話題性，自自然然有無數武林高手出嚟扮「救世主」，就好似PSP遊戲遭到破解之後，還要赤裸裸地Post上網，免費同大家分享一樣，目的好幼稚，原來只為一個「威」字！至於其他牌子手機嘅加密技術，Chris並冇特別解釋，佢建議大家不妨多啲更換手機Password，平時最好用密碼Lock實部機，一旦遺失咗，亦可將損失減至最低！
「黑莓」保安5重天
第1層 鍵盤鎖
必須輸入正確密碼先能啓動手機，否則呈「鍵盤上鎖」狀態；於限制次數後仍然輸入錯誤，手機資料會永久刪除。
第2層 防火牆
當你接收外界訊息時，用家可自行挑選某些作為拒絕接收嘅內容，例如SMS、MSN、InternetService等。
第3層 無線監控
有部份黑莓手機已支援藍芽耳筒，用家可在啓動Hands-free前設置一組密碼，等藍芽裏面嘅資料唔會俾人睇到。
第4層 裝置加密
除咗藍芽，GPS同USB都可設置加密數字，例如你用GPS去過邊度，都唔怕俾人知。
第5層 電郵加密
高級加密技術，發e-mail前，必須取得「證書」，並輸入一組密碼方能發送，接收者亦然。
謝利記：冇嘢係滴水不漏
冇錯！純粹聽一連串加密功能簡介，的確好難發現黑莓有乜嘢「死穴」能夠俾Hacker入侵，就算每一細微步驟如撰寫、運送以至接收3方面，全部亦做足晒功夫！
但曾經有改機王之稱，現時轉營售賣電子產品嘅Jerry，佢就唔認同手機保安系統係滴水不漏：「我唔係咁了解黑莓嘅加密技術達到邊一種程度，但只要有需求，自然有一大班發燒友會出嚟諗辦法解決，情況好似兩年前日本手機解Lock！當然，要引起佢哋重視，最起碼件Product要夠潮兼話題多多。」
至於一般手機更唔可以稱得上「安全」：「試過有客人拎部壞機嚟，要求我幫佢拎番裏面啲SIM卡、SMS資料出嚟，呢宗生意我冇接到。唔係技術困難，查實手機入面已刪除嘅資料，甚至係記憶卡檔案，都可以全部Recover，我最擔心，萬一部手機唔係佢本人，係用嚟勒索，我咪變成幫兇！」
二手Tips：唔解Lock隨時中招
配備加密功能嘅手機，一直唔屬於香港玩家心目中那杯茶，就連先達Sales都唔敢入太多呢類貨。店員阿豪：「我呢度有賣少量黑莓手機，但主要係水貨。因為行、水貨價錢相差太遠，例如一部8707g，行價約$3,880，但水貨只需$2,080就買到，差價達$1,800，個客梗係揀平嘢啦！」
店員阿君：「呢度淨係賣二手BB，但我建議大家放呢部機前，最好先拎部機上台解Lock，皆因即使資料已刪除，但依然留喺部機入面，只有解Lock重新將部機從『新』Reset一次，裏面嘅資料先可以真正永久Delete。」
阿豪:冇入過BB，因為唔多人問，反而內置BlackBerryConnect功能嘅手機就唔錯，例如M600i。
阿君:我哋行、水貨Blackberry都有入，但班客明顯鍾意買價錢低四成嘅水貨機。
玩家有Say
經驗值：1年
現有手機：8707g、8100
Steven「就算BB電郵俾人Hack嘅傳聞係真，我都唔擔心，皆因呢類屬於政治行為，根本唔牽涉到我哋班升斗市民。」
經驗值：2年
現有手機：7290、8700、8100、8800
阿華「一用咁就兩年，原因係經常喺出面做嘢，冇時間Checke-mail所致。但我唔相信BB咁易俾人Hack，因為加密技術做得好好，更勝其他PDA手機。」
