平日喺香港cool到爆嘅陳冠希（Edison），去到台灣就講乜做乜都得，認真大細超。日前Edison喺台灣擔任《康熙來了》嘉賓，接受徐熙娣（小S）同蔡康永訪問時，當眾拉開件衫，畀人睇佢入面條紅白色嘅孖煙囪。陳冠希又向女友Vincy發表愛的宣言，佢話：「我非常愛她，我們絕對不會分手！」
小S批分手
小S話同Edison用一萬蚊台幣（約2,500港元）賭佢哋出年底分手，Edison好自信咁話：「我們交往了快3年半了，絕對不會分手的！她很特別，很相信我，有自己的想法，跟她在一起很舒服，她不像我以前的女朋友都很崇拜我，反而會說不喜歡我的電影、專輯，很有自己的主見！」
Vincy喺美國讀書，陳冠希話遠距離戀愛唔係問題，佢哋每日都會上網傾偈，見面就一齊去睇戲食飯，佢仲會幫女友揀衫，小S話唔相信佢對女友咁體貼，仲話：「你們一定會分手！」，Edison依然冇發脾氣，仲笑笑口話：「不會啊，我就是這種人！」佢話如果第二個問佢咁嘅問題，佢一定會嬲，但因為小S係佢朋友，所以OK喎。
