國際品牌係商場大業主最想羅致嘅租客，皆因佢哋對開舖地點非常揀擇，可以話係佢揀你唔係你揀佢，而落得腳嗰個場肯定身價百倍。同時，呢啲品牌出手豪爽，又唔會走租，商場大業主發夢都想有個咁嘅好租客啦！
喺置地廣場已有旗艦店嘅GUCCI，剛落實承租地鐵尖沙嘴九龍站商場Elements一萬呎（實用面積），拍得住置地廣場間舖（萬零呎），仲係一層過，唔似置地廣場舖分兩層。另一個國際品牌PRADA，都租咗Elements一個實用面積5000呎嘅舖。呢啲國際品牌，畀嘅底租已經係市值水平，加埋分成，生意越好大業主越肥仔。Elements商場，地鐵佔80%權益，其餘由新地持有。
Elements面積近100萬呎，只得兩層，一期佔95%共180間舖，已經全部租晒，當中三成係首次嚟港開業嘅國際品牌，加埋GUCCI同PRADA呢啲港人愛到發燒嘅品牌，個場今年10月開幕後，會同置地廣場及尖沙嘴海港城正面交鋒，三個場都係名牌掛帥，啲客鍾意邊個多啲，好快有答案。