港交所個通告無紙化大計「披露易」登場，呢個備受爭議嘅新機制好定壞好難講，無他嘅，一向靠上市公司通告嘅報紙一定反對，事關又少咗瓣收入，但對普羅小股民嚟講，就可能係好事，皆因買咗嘅股票為乜事要停牌，唔使特登買報紙搵，上網就一目了然。
至於話停牌時間由一日縮短至半日，應該對個market係好嘅──不妨睇睇首批停牌半日嘅股份表現──安徽海螺同埋禹銘投資，前者噚日停半晝，下午復牌股價升1.9%到52.6元。
至於後者，上個禮拜五停牌，到噚日下晝復牌，股價一度升逾26%到0.6元，收市就報0.495元，升幅收窄到4.2%。同樣經過冷靜期復牌，海螺穩步向上；禹銘則急升急跌，披露易未能證明是否達到監管機構減少市場波動嘅目的。呢個俾老行尊稱為「四不像」嘅新機制係咪真係work，應該仲要畀多少少時間觀察！