好多嘢未做好前都唔好口快快講咗先，如果唔係就會變咗冇骨氣嘅查斯古特咁喇！呢位祖雲達斯前鋒之前好有骨氣咁同球會反面，點知周一就決定續約3年，真係樣衰到痹！
最令我求大客作嘔嘅係，查斯古特周二簽約之後講：「對於能夠繼續做個祖記人，我感到無比驕傲！呢個絕對係我一生中最重要嘅決定；球會畀咗我好多，我要繼續同球隊一齊爭取錦標。」唔熟悉內情嘅人聽到實感動到流晒眼淚啦！
月初曾向高層示挑釁手勢
不過我求大俠聽到，就等同嗰位兩度走光嘅女歌星，含着淚話自己唔小心露春光一樣，一笑置之！因為呢位法國仔月初意乙煞科戰入波後向高層展示挑釁手勢，賽後仲目露凶光咁鬧球會唔尊重自己㖭！乜咁快就變過塊臉啦？
查斯古特原本份合約08年先到期，𠵱家續約後將效力祖記到2011年。雖然冇透露佢人工點調整，不過祖記升班後發行新股大受股民支持，至本月中已籌集到近億歐元；所以查斯古特呢次都係被錢砸到腰骨都伸唔直㗎喇！
與球會臭味相投襯到絕
不過話說回頭，祖記同查斯古特又真係襯到絕！前者恐嚇、行賄打假波搞到意大利足球名譽掃地，後者就喺00年歐國盃決賽一腳射低意大利；既然大家都係意大利足球嘅負面代表，查斯古特今次冇骨氣，都唔會有好多非議聲啫！