還以為，肥佬黎會說「福佳始終有你」一類的話，結果他只是說，過去十年香港發展有80分、相信官商勾結不會再發生、十年之內一定有普選……感覺詭異得很。在沒有地產、中資廣告，每年少收兩億元廣告的日子，壹傳媒主席黎智英不覺得言論自由空間收窄，不過是有傳媒自我審查「自作賤」，「冇錢買LV走去做雞，然後賴經濟唔好。」
難道，這就是肥佬的橄欖枝？
不是吧！肥佬說，未有普選前《蘋果》不會賣，原因是，不想做「契弟」。 記者：張嘉雯
傳聞，2005年7.1，大會公佈21,000人參與遊行，《蘋果》採訪部上下群情洶湧，「有冇搞錯呀！點止咁少人呀。」那條由維園到政府總部的遊行標準路線，眾人行了N遍，多少人，大會公佈、警方數字、民意調查，都不及蘋果人的一雙眼；這雙眼，恨鐵不成鋼。
傳聞還有很多……
去年中，政府拋出銷售稅方案前夕，行家搶先報道，《蘋果》被拒諸「放風」會門外；
曾蔭權舉行的記者會，蘋果人被點中提問的機會低過中六合彩、難過中3T；
網上點擊率跌到新低，六四前夕，頭條依然一天、兩天、三天開滿自由花；
「冇所謂，食得鹹魚抵得渴，我哋冇所謂，佢到底係一個獨裁政府，我哋呢啲oppositionnewspaper（反對派報章），針對我哋，在佢嚟講都好天公地道嘅。」這陣子，肥佬黎在報章撰文，接受傳媒訪問，都在說，這兩年少了兩億廣告；回歸前夕，他跟友人在家中開派對，之後親睹民主派議員告別立法局，覺得無奈、恐懼又亢奮，那時根本無想過，主權改變會對他的財富帶來甚麼影響。
「初初淨係諗住如果唔搞嘢，堅持立場，遲早俾人慢慢侵蝕，慢慢畀壓力，被邊緣化、放逐，所以咪過台灣搞《蘋果》囉。」他承認，台灣是一個極大的言論平台，對大陸而言有一定影響力，「香港係囊中物，台灣佢哋仲想爭取。」
回歸前杯葛是偶然，03年胡錦濤上台後，廣告杯葛變得有組織、有規模，「以前都會傾吓，俾個excuse（藉口）你，𠵱家傾都唔肯傾，上面嘅力幾大可想而知。」
國際傳媒愛訪問他，視《蘋果》為言論自由的指標，「我同意人哋會咁期望，我哋都唔想肩負呢個責任，但係責任已經放咗喺我哋背上；錢我都計算㗎，唔計算我仆咗街啦，但係你要我今日轉軚，畀番啲廣告我，畀我返大陸，我都唔會囉。」
他認為中央有施加壓力，但傳媒自我審查「冇腰骨」才是關鍵，「你自己自作賤，唔怪得人㗎喎！好似有人話香港經濟差，份工賺唔夠錢買LV就走去做雞，講唔通吖嘛，𠵱家又無拉人，又冇恐嚇，我都冇俾人威脅啦，係你自己self-censorship（自我審查），唔可以生安白造話冇言論自由。」
有關出售《蘋果》的傳聞，這幾年聽得特別多，「成日有人話想嚟買《蘋果》，乜乜物物，唔知係咪有人叫佢咁做定自告奮勇啦，可能諗住搞掂我之後上去領功又唔定，呢啲無聊嘅人、膚淺嘅人好多嘅。」
「如果香港有民主，我哋堅持嘅重要性就冇咁大，但𠵱家唔會賣囉，我做契弟呀？我有兒有女有孫有錢，唔通要佢哋揹住阿爺阿爸係契弟嘅名過一世咩！」
回歸10年，他認為香港的發展值80分，「傳媒算有自由，雖然有人大釋法，但都係行錯，走錯步法啫，法治仍然健在嘅，唔拉人，算係仁政啦，董建華政府官商勾結，Cyberport（數碼港）、胡仙，𠵱家都無啦，𠵱家都唔敢做啦，明天會更好嘅。」
民主自由是世界的主流價值觀，他深信中共終有一天會改變：「呢個世界唔可能忍受唔入流嘅國家，你係獨裁者，人哋始終睇你唔起，香港係好好嘅PR（公關），如果香港有民主，可以令人覺得『中國真係接受民主』，對世界展現比較親切嘅面孔，改善形象。」
「但係民主呢樣嘢，唔會自動自覺畀我哋，佢哋（中央）始終有恐懼，我哋要幫佢克服，有啲香港人，生活好啲，經濟好啲就唔出嚟講，但係唔得，我哋唔可以自滿，唔可以有惰性，要出嚟行、出嚟講，等曾蔭權去幫我哋fight（爭取）。」
在《蘋果》的日子，同樣完成一單訪問，行家會說：「呢啲嘢，我哋唔會鬧㗎喇，你哋鬧啦，你哋寫多兩句啦。」新入行的同事讀到友報訪問高官，感覺不是味兒，「熟蘋果」走來提點：「呢啲嘢，你唔好恨㖭呀，做咗都唔知點出，幫佢sell嘢咩。」最常聽的，是被訪者跟記者說：「喂，你哋要撐住呀，我睇你哋報紙㗎。」
上述種種傳聞，都是真的，希望肥佬的話也是真的。我們要撐，撐到民主普選開花結果；讓世人，咬《蘋果》，知善惡。
回歸10年倒數3日
壹傳媒的10年
1997年
2月，《蘋果日報》獨家刊登鄧小平遺照；成立蘋果網絡；創立《飲食男女》
1998年
2月，《蘋果日報》長沙灣報社收到炸彈恐嚇
10月，天平邨三母子墮樓事件主角陳健康北上尋歡，《蘋果》其後就記者出錢予陳嫖妓以頭版刊出全版道歉啓事
1999年
6月，成功買殼百樂門上巿，易名為「壹傳媒」
6月，創辦「蘋果速銷（adM@rt）」，其後再拓「蘋果旅遊」，兩大超巿集團杯葛，不在《蘋果》刊登廣告
6月，《蘋果日報》揭發稅務局前局長黃河生利益衝突
8至10月，《蘋果日報》地產廣告被抽
2000年
招聘200人負責網上新聞，後因科網爆破，裁減職位
8月，《蘋果日報》揭發前立法會議員程介南以權謀私
11月，結束「蘋果旅遊」
12月，「蘋果速銷」虧損10億全面結業
2001年
5月，創辦台灣《壹週刊》
2003年
3月，揭發財政司前司長梁錦松偷步買車
5月，創辦台灣《蘋果日報》
7月，7.1大遊行《蘋果日報》印海報及貼紙
2005年
6月，《蘋果日報》創刊10年
2006年
6月，《壹本便利》刊登少女組合Cream的14歲成員李蘊濕身照
8月，《壹本便利》刊登鍾欣桐更衣照片
10月，在台灣推出免費報《爽報》
12月，推出《Me！》，與《忽然1周》及《飲食男女》合併出售
2007年
6月，《壹本便利》易名為《FACE》
6月，《蘋果日報》推出「蘋果動新聞」網
資料來源：《蘋果》資料室
