香港上市公司商會轉由何猷龍揸fit後，真係活動多多，噚日又有新猷，同浸會大學合作推出香港首份公司管治約章，目標係深化上市公司企業管治文化，仲會進行調查，睇吓上市公司對𠵱家運作守則同公司管治措施嘅睇法，遲啲公佈有關結果；而今年底又會搞個香港公司管治卓越獎，表揚對公司管治有傑出表現，同為股東及其他利益相關者爭取權益獲得成就嘅上市公司。
何猷龍介紹，約章簽署純粹出於公司自願，只要認同約章內啲企業管治精神就得，約章涵蓋8大範疇，包括承諾及政策、企業社會責任、股東權利及參與等。約章發表首日已有30間上市公司簽署。
對於港交所推行嘅電子通告新措施，佢話對市場好，為上市公司帶嚟方便同慳成本，投資者同股東都接受，亦係國際發展趨勢；佢跟手仲幫香港上市公司商會宣傳，話商會個網站都可發放有關上市公司通告，夠晒落力。