樓市經過舊年呆呆滯滯，今年上半年跟住股市走，一二手市場都旺番，舊年有唔少日子要紮住肚皮過日嘅地產代理，上半年叫做到數，加上勞動市場又好旺，唔理為咗留住啲後勤員工，定係想鼓勵士氣，公司除咗加人工之外，都樂意將收成分啲畀佢哋。
一直冇講過後勤員工加薪幅度嘅中原地產，可能見政府最近主動全面調升公務員薪酬，自己上半年營業額超過10億元，終於宣佈下個月起全體後勤員工平均加人工4個巴仙，下個月中又會畀多四分一個月人工做花紅。連埋年初畀嗰四分一個月花紅，中原班後勤小花同小哥，上半年都叫做出多半個月糧。
但中原就唔及同系嘅利嘉閣地產慷慨喇。利嘉閣噚日都公佈下個月中會向後勤員工出多四分一個月糧，加埋農曆年多畀嗰半個月糧，同5月時出多嘅四分一個月糧，上半年花紅夾埋足一個月，而利記年初已經快中原一步，平均加3%人工。利嘉閣話，如果下半年個市繼續旺，分分鐘出多一個月都唔出奇。
利嘉閣仲威 花紅派三次
至於美聯物業同香港置業就同大家「溫故但未知新」，佢哋冇話下個月會唔會分花紅畀後勤員工，美聯話佢哋上半年已經出咗相等於六成月薪嘅花紅，年初又出過1000蚊賞金，之前都加咗4%人工。
而加薪幅度最慷慨嘅香港置業，負責人話上半年加咗5%人工，花紅都出多過一個月咁話。
不過，始終做代理呢行都係「三更窮五更富」，好睇個市做人，希望下半年可以繼續旺，前線搵到食，班後勤可以齊齊開心啦。
[email protected]