超大農業25號收市後宣佈更換核數師，穆廸噚晚嗱嗱聲將超大嘅前景降級，由穩定降到「負面」。啲基金股東連續兩日喪沽超大，前日跌十個巴仙，噚日再跌十五個巴仙。啲小股東揸住嘅股份梗係齊齊縮水。不過，超大嘅大股東兼主席郭浩卻喺上個禮拜四沽咗1.2億股超大，每股6.9元，骨咗8.28億元。
雖然郭浩都減持鬆人，但超大仍然有知音人，就係標準普爾，同埋美資行摩根大通。標普話，超大都確認咗同核數師唔係意見分歧，而會計慣例同發展策略都唔會有變，佢哋會昅實有咩唔妥，先將超大降級。摩根大通亦維持超大「中性」嘅投資評級，理由亦係要撇嘅核數師都話咗冇意見，換咗均富係冇影響。但個市場就覺得係大事，噚日有成4億幾成交額。
換人骨水有前科
其實超大換核數師早有前科，03年4月又係核數師羅兵咸話，因為核數費條數傾唔掂而唔do。不過，嗰次換完核數師，郭浩先至配舊股套現，今次就將個次序調轉。至於股價表現亦調轉，今次公佈後股價喺咁跌；上次就見底回升。
03年嗰次批股，接貨嘅人係惠理基金，每股0.88元，𠵱家惠理都賣晒股賺晒。但上個禮拜接咗郭浩嗰手貨嘅人就慘，每股6.9元，但噚日超大股價跌到5.24元，賬面輸咗二十四個巴仙，真係喊得一句句！
郭浩呢？除咗03年批股套現咗5280萬之外，其實佢舊年亦沽咗1億股套現5.6億元。計埋啱啱上個禮拜批股，郭浩𠵱家揸住超大只係25.56%。
[email protected]