悠穎馳都算係個愛車之人，細細個就開始收集各種玩具車，房車、跑車、貨車、巴士，甚至坦克車都有，後來人大咗，玩真車就梗係唔在講，就連個竇（即係屋企）嘅陳設都唔少得車嗰份，甚麼車形廁紙筒，車地毯……就連窗簾都係用車嘅圖案。不過，自以為係超級大車迷嘅我，今日竟然俾人一鋪打殘！
唔使講咁多，睇相先，呢架車外形點？成架甲蟲仔（福士Beetle）咁，好鬼Cute？睇真啲，原來係間屋嚟㗎！竟然有人癲到將成間屋變成一部車，兼且仲要同真車一樣，喺一堆外觀平凡嘅屋之間夠晒搶眼，擺明要將自己對車嘅熱愛公告天下，咁鬼大製作，真係邊夠佢玩！悠穎馳真係幾佩服呢位仁兄，有本事將呢架超級大車整得鬼咁Cute之餘，仲顧及到佢作為一間屋所應有嘅環保概念，用咗唔少落地大玻璃，重有埋花園，真係睇得過癮又實用。吖，唔知香港嘅車迷幾時先咁有幽默感呢？
悠穎馳
豪邁不羈，愛車如命，聽幾下引擎聲就知咩車！