亨亞噚日搞咗個傳媒飯局，講吓公司喺加拿大多倫多上市嘅最新進展，行政總裁周博裕話，佢哋曾經考慮過去美國上市，不過美國有條嚴厲嘅薩班斯法案，都係怕怕。
佢舉例話，根據有關法規，上市公司開董事會，都要搵個獨立律師坐喺旁邊，睇吓會唔會講錯嘢，真係好煩；而且美國嘅小股東可以向上市公司提出集體訴訟，好容易惹來官司多多。
加拿大費用平過香港
佢又話，就好似最近當地有個法律界人士，只係因為條西褲被一家韓國洗衣店整唔見咗，咁就告上法庭要求對方賠償5億幾港元，最神奇就係法官亦接納佢嘅訴訟，正在打官司，真係人都癲！
至於加拿大同香港上市嘅比較，佢就話加拿大要求上市公司每季都要發表業績報告，香港暫時唔需要主板公司做呢家嘢，但睇嚟呢個都係大趨勢；至於上市費用例如律師費等，加拿大就平過香港喇。