當「咪神」遇上「籮霸」，原來會惺惺相惜。前晚16位港姐佳麗身穿晚裝，喺番禺長隆酒店選出「旅遊大使」，舊年港姐「旅遊大使」得主、着低胸衫騷哥利嘅咪神徐淑敏擔任評判，佢投「巨籮黎姿」2號何傲兒一票，結果何傲兒勝出，企正隔籬嘅3號張嘉兒即時面色一沉，失望之情盡現。
得徐淑敏力撐
前晚一眾佳麗要作1分鐘才藝表演，下盤穩健嘅何傲兒彈古箏演奏《錦上花》，扮熱帶女郎嘅張嘉兒就跳草裙舞，仲跳到落台向徐淑敏送花環，博得全場起哄，所以當佢聽到大會宣佈何傲兒得獎時，忍唔住當場眼紅紅，但死撐話：「係啲閃燈犀利得滯啫。」
舊年徐淑敏係港姐大熱，但奪旅遊大使獎後三甲不入，何傲兒嘅情況同師姐幾相似，難怪佢打定輸數話：「自己努力做好自己，唔入三甲冇所謂。」但徐淑敏力撐：「何傲兒係我心水，啲人講佢身材唔緊要，女大十八變。」