鄭希怡前日在多倫多於直播期間露點，事件成為娛圈熱話，不少女星及名模均發表意見。
葉佩雯：吓？又嚟呀？自己試過跳舞戴冇帶嘅bra，動作太大走位，自己都即刻擰轉背拉番件衫，怪自己冇打好底。雖然做呢一行，但唔係乜都畀人睇，下一次佢應該戴個NudeBra，就算件衫走位都係畀人見個膠，冇咁蝕嘛。
樂基兒：佢都已經好慘，係意外啫，佢應該都好難受㗎啦，歌手同我哋模特兒唔同，我哋只要專心行天橋，唔使有跳舞呢啲動作，如果係我會貼雙面膠紙同埋用魚絲吊帶，咁樣會穩陣啲。
呂慧儀：我覺得佢好慘，上次我做博愛名人廚房件衫都好低胸，個咪又好重扯住件衫，所以特別小心。我記得有次黐膠紙太實，點知撕甩皮，不過小心啲好過大意外。當係人生經歷，經一事長一智，咁就唔會有下一次。
鄭融：一個女仔喺公眾地方發生咁嘅事，一定會好難受。因為以前游水搞到有肌肉，所以我唔會着tubetop，遇到咁嘅情況，無論點都係整番件衫先，就算堅持唱同跳都已經影響咗個演出，咁同整番件衫係冇乜分別，每個人要保障自己係好正常。（會唔會用乳貼？）睇件衫嘅結構，平時我嘅助手有個好大膠袋，裝滿膠紙。