「肥仔，有冇信心做導演？」十多年前的一天，杜琪峰導演在電話中問我，「……」一時之間反應不過來，電話中一片沉默，杜導演見我不答話：「點呀？驚呀？」這句倒容易回答：「你搵老板大嗱嗱攞錢出嚟投資都未驚，我驚乜？」
於是，杜導演給予了我第一次當導演的機會，也監製了我的處男作《呆佬拜壽》，也是在那個時候，我認識了游乃海。乃海當時細皮白肉（到了今天還是細皮白肉，不見鬚根，不見暗瘡），一派書院派唸書人模樣，剛投身杜導演班底不久，緊貼着杜導演，事無大小，總之與故事創作有關的，乃海都會出現。
我與李敏是《呆佬拜壽》的編劇，但嚴格來說，乃海也應是一份子，話說由於《呆》片要跟大陸搞合拍，但時間緊迫，雖然已共識了詳細的故事大綱及分場，仍需要在數日內交出白話劇本予送審，我與阿敏正忙於返大陸一邊睇景一邊編寫拍攝稿，杜導演便委任了乃海根據分場編寫送審稿。那天晚上半夜三更，想起了在九龍城辦公室內通宵寫稿的乃海，於是買了宵夜前往打氣，只見乃海在暗室的孤燈下，穿着背心、傳統大地牌睡褲，腳上勾住一雙人字拖，一派快將就寢模樣，但眼睛卻瞪着天花，口裏含着走珠筆，一派專心考狀元模樣。將宵夜攤開，邊吃邊談，問到進度。乃海說已完成一半，當時便順口說道：「呢段稿只用嚟送審，求其劇情同分場一樣，唔使寫咁細喎，求其得啦！」乃海聽後睩大對眼透過眼鏡望實我：「唔得！寫劇本喎，自己都唔覺得好玩點寫呀？唔求其得！」
乃海尊重劇本，對自己有要求，我在乃海身上學了重要的一課，《跟蹤》得到一致的好評，恭喜游導演。