亞視藝員杜挺豪（Derek）和黃愛瑤，拍拖七年，今年4月二人之間出現了一個第三者，他的名字叫Daniel，重7.26磅，鼻大大，面尖尖，他就是杜挺豪和黃愛瑤的愛情結晶品。最初Derek知道女朋友黃愛瑤有BB的第一個反應是茫然，但不經不覺Daniel已兩個月大，抱着Daniel的新任爸爸Derek，臉上流露慈父神情，一家三口幸福洋溢，證明新生命的而且確能為人帶來無窮的希望和歡欣。 撰文：楊潔雯
杜挺豪和黃愛瑤為乖仔取名Daniel，與靚仔影星吳彥祖擁有相同洋名，因為雙親都想BB將來像吳彥祖一樣靚仔吧！至於Daniel的中文名，黃愛瑤則要保持神秘。
Derek和黃愛瑤拍拖七年，去年黃愛瑤意外懷孕，記得黃愛瑤興高采烈地向外公佈她未婚懷孕的消息，她一句：「我有咗！」大家都替她高興。
爸爸以身擋雨
可是Derek當時接受訪問卻一臉茫然，並說：「話開心就係呃你！」真是坦白得令人擔心，不過現在一家三口接受訪問，Derek手抱着可愛的囝囝，臉上已換上了滿足的笑容，不停叫BB、BB。
訪問那天，天公不造美，突然下起大雨，Derek立即用自己的身體為愛兒遮風擋雨，而媽媽黃愛瑤則火速推着BB車緊隨其後，果然是夫唱婦隨，二人雖然是新任爹哋媽咪，沒有照顧嬰孩經驗，不過湊起BB又十分合拍，一家三口拼成一幅幸福畫面。
媽媽冇晒朋友
首次做媽咪的黃愛瑤心情興奮，就算不眠不休餵人奶兼換尿片都絕無怨言，她說：「𠵱家真係到咗人生另一個新階段，我好enjoy，呢種生活我嚮往咗好耐，BB出世後我就想日日陪住佢，𠵱家真係乜都唔想做，淨係想同BB一齊，最大唔同嘅就係冇晒啲朋友，以前會同班friend去飲嘢傾偈，𠵱家唔敢搵你，連打麻雀都冇喇！」
BB教育早籌謀
榮升爸爸的杜挺豪開心之餘又擔心，他說：「𠵱家啲小朋友，成日俾人寵壞，我驚佢第日太多人錫。」
儲備教育基金
李珊珊曾在廣告中提及，養大一個小朋友要花費400萬。
非理性的媽媽黃愛瑤，對於BB的將來，似乎沒有長遠的打算，她說：「冇plan，順其自然喇！」而Derek則計劃多多，他說：「我諗住第日畀BB去加拿大生活，始終嗰邊教育同環境好，香港壓力大，一係返內地，內地發展將來會好好，我又好想佢學普通話，總之可以識多國語言就好着數，所以我諗住幫個仔開個戶口，買股票投資，當做佢嘅教育基金。」
攝影：陳順禎
場地提供：又一城
