數碼達人:<br>太陽能叉電 曬1粒鐘傾10分鐘

數碼達人:
太陽能叉電 曬1粒鐘傾10分鐘

同老闆傾傾吓電話,唔夠10分鐘就嗌冇電?分明等炒啫!擒擒青周街搵7仔、OK快叉?亦未必係辦法。不妨試吓呢部太陽能充電手機;N55唔一定專為打工仔而設,炎夏30幾度高溫,穿上比堅尼嘅性感美女一樣可以帶住佢邊曬太陽邊充電,就算你成Day諗盡辦法榨亁佢,例如聽歌、影相、煲粥,佢都仲可以翻叉,只怕你曬足一日受唔住變成人亁啫!

記者:陳國輝
攝影:陳陶鈞 Model:Hilda

插住用 邊講邊叉

太陽能唔係乜嘢高科技,有留意星爺電影《國產零零漆》,聞西(羅家英飾演)發明嗰支太陽能電筒,就知佢有幾流。當然啦,冇光嘅地方就肯定用唔到,小記為測試佢最強一面,專登先將N55啲電放走晒,再去清水灣沙灘暴曬1粒鐘,吸收陽光精華,你估吓跟住可以用幾耐?

■先將USB太陽能充電器,接上手機。

■將按鈕指向ON,就開始進行叉電。

■記住!見到呢個畫面先證明叉緊電。

用嚟傾電話原來唔夠10分鐘,不過咁,你可以一直插住呢部外置式太陽能充電器,一路講、一路叉;若然想享受陽光與海灘嘅美景,仲可以一路播MP3歌一路叉,幾咁Enjoy!另外值得留意者,是太陽能充電器是以miniUSB作叉電,因此不同品牌嘅手機,只要對應miniUSB作叉電者都會啱用!記者做測試時就遇有途人問有冇得「齋買」,不過店員表示要連手機買,並冇分拆!

■跟機仲有傳統電線火牛,都係駁USB作充電。

機身逐格睇

■雖然相機差啲,不過機背有4隻喇叭,聽歌好炸得!

■機身有數字Keypad,但亦可用Stylus操作。

■跟機送兩粒鋰電,怕唔夠用最好帶定另一粒備用。

■跟機會送上一張256MBmicroSD,齋聽歌實夠玩。

女性功能Check瘦身

N55其實幾啱女仔用,一來帶去沙灘玩足一日,都唔使驚冇得充電,二來外形尚算的骰,以近期走大芒路線嘅國產機而言,佢重量僅110g,放褲袋輕盈有餘,而且屏幕闊度達到2.6吋,玩TouchScreen手寫SMS都幾實用。
更值得一提係,機內設置咗兩項女性分唇,一種係「身體質量指數」,亦即評估你身高與體重嘅比例是否健康,至於另一個「女性生理周期」功能,當然係用嚟計算M到日子啦!雖然兩項功能唔係新嘢,但成日曬太陽對身體都未必好,有咗呢兩個分唇幫你,曬夠就好走喇!

■個芒咁大,睇相都唔錯,但只有VGA鏡頭(30萬像素)用嚟影相咪搞!

■哎呀!我偏瘦㖭,都係食番多啲嘢好過去曬太陽。

■內置壽司版《鑽石方塊》,感覺好食兼好玩!

■多媒體播放器支援MP4格式影片,用2.6吋芒睇效果唔差。

Profile

制式:GSM900/1800
體積:107.7×52×15.5mm
重量:110g
通話時間:120-180分鐘
備用時間:50-150小時
主要功能:外置式太陽能充電器、多媒體播放器、藍芽、VGA相機、來電影片、身體質量指數
樂俊(23806098)

後記:蠱惑招!隨街搵電叉

帶住部太陽能充電器出街有幾方便?嗱!就算你唔諗住行沙灘,改行商場,齋靠店舖射燈一樣叉到電,最緊要係人哋唔知你做緊乜,叉電又唔使錢嘅,走多幾間舖頭照吓射燈咪當Shopping囉!
再唔係,學吓星爺帶多支電筒,照住個太陽能叉電嚟講電話!想效率高啲可配支SUREFIRE戰術電筒,可能會有快叉效果;隨時隔籬位小姐唔知,仲以為你拍緊《CSI》或《X檔案》㖭,幾型呀!

■夜晚行商場時,可以喺櫥窗「偷電」,勁鬼馬!