阿Net向來都係日本水着偶像嘅狂熱分子，不時會上網留意啲性感靚女嘅動向，身為阿Net偶像之一嘅日本性感女神熊田曜子，早排喺電視節目入面公開自己嘅香閨，日本網友已火速將節目片段放喺自己嘅網誌度畀各位同道中人分享。
可愛浴缸任睇
講真熊田曜子雖然係日本水着界嘅姐仔，但始終唔係一線大明星，預咗佢嘅香閨唔會係乜嘢豪宅，佢住喺一個好細嘅斗室，同一般打工仔無異。不過熊田勝在好識做，除咗公開浴室入面個細浴缸，佢仲喺入面放咗好多玩具鴨，香艷又可愛。佢洗完面換咗套街坊裝後，仲對住鏡頭搔首弄姿，整咗個谷胸甫士畀大家睇，真係交足功課㗎！
讀母信忽落淚
身材正斗嘅熊田仲公開自己保持纖腰嘅秘密，原來佢每晚都會喺腰部一邊搽上瘦身啫喱按摩，難怪佢身材咁結實有致啦。佢仲喺觀眾面前讀出媽媽寄畀佢嘅親筆信，熊田一路睇一路喊，連阿Net都好感動。不過，佢未喊完又繼續搽啫喱按摩條腰，好刻意扮出一副可憐相，搞到阿Net真係哭笑不得！
私房生活窺秘
網址： http://youtube07.blog78.fc2.com/blog-entry-1013.html
版主：阿Net
本欄逢周一至五刊出