國家開發銀行喺香港發行嘅首批人民幣債券，今日正式公佈細則，地點借用金管局喺中環國金中心嘅靚靚演講廳舉行，出席嘉賓人馬沓雜，財金界猛人如雲，除咗久別香港嘅開發行行長陳元之外，仲有人行行長助理馬德倫；港府方面，有候任政務司司長唐英年，同金管局總裁任志剛，而中央駐港聯絡辦副主任郭莉，及證監會主席方正亦會現身。
安排座位頭痕
包銷行滙豐同埋中銀香港，分別由執董王冬勝及總裁和廣北做代表，由於金管局個場面積唔算大，咁多高官齊齊出席，睇怕主辦單位安排座位都幾頭痕。
開發行行長陳元，早於出任人行副行長年代，已經同任總非常熟稔，當時距離香港回歸仲有一段時間，好有政治觸覺嘅任總，就開始同人行定期交流，今次開發銀行肩負祖國在港發行人民幣債嘅開路先鋒，喺任總個場大搞宣傳推廣，亦非常合理。