噚日晏晝喺北京政協禮堂門口舉行嘅香港回歸十周年電影界慶祝晚會，真係好鬼大陣仗，行紅地毯嘅粒粒巨星，包括有梁朝偉、吳宇森、章子怡、周迅、黎明、郭富城、陳慧琳、徐克、馮小剛、曾志偉、陳可辛、爾東陞、袁詠儀、張智霖、胡軍、梁詠琪、梁家輝、陳木勝、余文樂等等。
掛大串飾物累贅
紅地毯由下午4點半開始，一直行到6點45分先完，有咁多巨星出現，現場迫滿追星嘅巿民，起碼有過千人，因為接近7.1回歸，北京政府好關注安全問題，現場嘅警察同保安人數，加埋都有成500幾人，都咪話唔誇張。出席嘅女星之中，以低胸裝上陣嘅章子怡同周迅最為性感，不過章子怡胸口上嘅大串飾物，打扮有啲不倫不類。
北京噚日氣溫有成37度，當地啲人話呢個係「桑拿天」，熱到暈，女明星喺紅地毯鬥性感，可以着得少布啲涼爽啲，男藝人就慘咯，仲要着西裝打呔，馮仁昭都戥佢哋辛苦。
此外，薛凱琪噚日接受商台嘅長途電話訪問，提到早前到日本工作，佢話自己都有興趣拍攝裸照，薛凱琪話：「女仔喺唔同年紀都有唔同美麗之處，我好想影㗎，或者叫媽咪影囉。」
北京直擊
