大笨象今年嘅「滙豐青年企業家獎」繼續搞得有聲有色，吸引全球超過3600名大專生參加，亞洲區嘅最後六強，噚日喺滙豐總行終極激鬥，最終孟加拉隊贏咗，全組人瓜分10萬港紙獎金。第二名嘅菲律賓隊，各人亦獲贈電子手賬一部。同家燕姐有啲似樣嘅滙豐銀行總經理梁高美懿（圖），索性嚟個「皆大歡喜」，17名到場參賽嘅後生仔，都可以拎隻韓國巨星Rain嘅CD返屋企。梁太話，阿Rain好勤力，跳舞、唱歌、行騷、拍劇瓣瓣掂，希望大家可以學習吓。佢仲話，囡囡都封阿Rain做偶像，兩母女不時聽對方鍾意嘅音樂。咁唔知梁太係咪都好冧阿Rain呢？
李潤芳攝