由76年《少年十五二十時》的學生哥Louie，到80年代《歡樂今宵》趣劇《蝦仔爹哋》已成家立室的蝦仔，以致今日鬚根滿面的50歲中年，賈思樂得天獨厚仍舊是那張孩子臉。過去《歡樂今宵》曾帶給賈思樂無限歡樂回憶，但最刻骨銘心的，卻是珍貴友誼，回想起赴大馬發展時，鍾保羅送上的指南針、對方跳樓輕生前的一個問好電話，賈思樂禁不住哽咽起來。 撰文：戴彩煥
賈思樂74年在《聲寶之夜》歌唱比賽勝出後，在《歡樂今宵》（EYT）當合約歌手，雖然不懂中文也沒有演技，但偏偏被甘國亮睇中，找他做自己首部執導劇集《少年十五二十時》男主角，成績超乎理想，由原本13集添食到26集，而賈思樂亦一下子變成青年人偶像，聲價十倍。
獲甘國亮提攜
獲甘國亮器重，賈思樂的感覺是受寵若驚，但最意想不到的，是甘國亮對他百般遷就，賈思樂說：「佢好有心機教我，知我唔識睇中文，自己就錄低所有對白，然後畀盒錄音帶我聽熟記熟嚟拍。」
賈思樂拍劇雖然頻頻NG，但從沒被甘國亮罵過半句，反而在《少》劇中飾演他同學的杜琪峯，待遇卻不一樣，賈思樂笑道：「阿杜始終係藝員訓練班出身，有真真正正嘅訓練，佢起碼要交到啲功課，所以有時阿杜NG，甘生係𤷪啲㗎。」
除《少》劇外，《歡樂今宵》最長壽趣劇《蝦仔爹哋》也是賈思樂演藝事業的代表作，問當年《蝦仔爹哋》有那些難忘往事時，賈思樂最深刻是矇豬眼盧海鵬和大白鯊林建明鬥爆肚，無論戲裏戲外也嗌大交，他說：「佢哋去到邊嗌到邊，有年我生日一齊食飯，阿鵬（盧海鵬）一時唔記得用公筷，阿Ming（林建明）鬧佢，阿鵬即刻扯火鬧番佢轉頭：『我呢對筷子新㗎！』跟住兩個又嗌起上嚟，我哋全場靜晒，但嗌完交佢哋又唔會面左左！」
一直陪伴霞女
《歡樂今宵》不僅僅帶給賈思樂美好歡樂回憶，同時也帶給他不少珍貴友誼，只是，這些友誼全都一瞬即逝，包括1989年跳樓輕生的鍾保羅和1993年病逝的余綺霞。賈思樂說：「阿Paul（鍾保羅）除咗好有才華之外，仲係一個令你好感動嘅人，記得86年左右，我去馬來西亞發展，臨上機嗰日，阿Paul送咗個指南針畀我，話希望指南針會指我alwaystotherightdirection，嘩，我望住佢……我眼濕呀……hereallytouchedmyheart……」賈思樂說到這裏已哽咽起來。
89年9月1日鍾保羅在寓所跳樓前，原來打過電話給賈思樂，他說：「我check番電話message，原來阿Paul打過畀我，佢話：『Louie，你同我講話後日食飯，我唔去啦，你哋玩得開心啲，咁好啦，你takecare啦，拜拜！』結果佢講完之後就跳！佢根本一早plan定，之前佢借我嘅英文書，佢都寫低叫細佬還番畀我。我同阿Paul幾傾得埋，嗰時我同霞女好friend，阿Paul好鍾意霞女，想追霞女，所以大家特別close。88年我同霞女飛去澳洲拍外景遇到交通意外，阿Paul都即刻飛過嚟睇霞女，佢真係好鍾意霞女㗎。霞女有事，佢都一路喺佢身邊。」
應變能力甚強
鍾保羅當年自殺，賈思樂深信因為一個「賭」字：「我聽聞佢借咗大耳窿錢還唔到，佢借20萬，但係snowball咁去到200幾萬。有次開工見佢口損眼損身損，我問佢乜事，佢話打波跌親，但啲人話佢係俾人打。喺廣播道，好多時有幾個男人喺TVB對面等佢，我自己都親眼見過，佢一行出嚟，班人就行過去，我個心當堂跳一跳……
「到今時今日，我當然好尊敬何守信，但我覺得鍾保羅係thebest，佢中英文都好流利，講嘢又有時代感，好多時新人同前輩做嘢會緊張到唔記得，但阿Paul會幫你兜，仲兜得好自然，唔似有啲司儀做到好明顯話幫緊你，俾全世界都睇得出佢係教緊你。」
賈思樂續說：「有次肥姐同啱啱入《EYT》嘅鍾保羅一齊做司儀，佢哋要介紹某啲嘢，有時肥姐聲太大，係會嚇到啲新人，佢當日有小小教訓阿Paul，但阿Paul好瀟灑好大方咁將個波交番去肥姐度話：『多謝晒啦肥姐，但我都handle到嘅』，我喺電視睇到拍爛手掌，佢應變能力好高，唔會挖苦你，令到人好舒服。嘟嘟都話，同咁多人合作過，最好係阿Paul。可惜佢去咗另一個世界，再搵唔到另一個鍾保羅。」
人物誌：靚聲入行
現年50歲的賈思樂（LouieCastro）於澳門出生，父親是葡萄牙人，母親是中國人，74年他在《聲寶之夜》歌唱比賽勝出後加盟無綫，主演劇集《少年十五二十時》，之後與露雲娜主持年輕人節目，被塑造成金童玉女，及與張國榮82年演出電影《衝擊21》等。80年代初賈思樂赴台灣發展，後因母親病逝返港，加盟《歡樂今宵》，演出趣劇《蝦仔爹哋》大受歡迎。90年賈思樂加盟亞視，與翁虹主演劇集《最佳才子》，91年轉投新城做DJ，01年自資製作公司接騷。
