每年游完龍舟水之後，猛烈太陽出來了，氣溫日日升，這個時候開始直到8月，就是黃油蟹當造期，最正！黃油蟹除咗原隻清蒸之外，其實仲有好多花臣可以搞，今日教大家一蟹4食，既可同人Share美味，亦食少啲膽固醇，健康啲又開心啲！
記者：趙珮倩
攝影：陳陶鈞
示範：劉傑盛師傅
怪師傅烹飪工作坊（23930622）
蟹蓋
蟹蓋焗芝士伊麵
需時：10分鐘
價錢：$38/2人
材料：黃油蟹蓋1個、伊麵1個、芝士1片、雞湯1杯
做法：先將伊麵以滾水烚腍，瀝亁備用；燒熱鑊，下少許油，放入伊麵/雞湯/蟹蓋，鋪上芝士，冚蓋焗大約4分鐘至收亁水即成。
蟹膏
黃油竹葉籠仔飯
需時：30分鐘
價錢：$35/2人
材料：蟹膏（1隻蟹份量）、糯米50克、雞湯1杯、竹葉4塊、葱花少許
做法：蒸籠以竹葉鋪底，放入拌了雞湯的糯米冚蓋蒸20分鐘至熟；然後放上蟹膏，冚蓋蒸10分鐘，待蟹膏香味滲入糯米，撒上葱花享用。
蟹身連腳
蛋白醉酒蟹
需時：20分鐘
價錢：$35/2人
材料：蟹身連腳（1隻蟹份量）、雞蛋2隻（取蛋白）、花雕酒1匙、夜香花/鹽/雞粉/胡椒粉各少許、豉油適量
做法：先將蛋白拂勻，加入1:1份量的水，下鹽/雞粉/胡椒粉調味；將蟹身連腳放入蛋白液中，蒸15分鐘；之後加入花雕酒/夜香花，大約2分鐘，吃時可淋上豉油。
知多啲：夜香花好快熟，所以要最後落，而揀夜香花要揀花冧未開的，避免入面有蟲。
蟹箝
芥辣蟹箝凍
需時：5分鐘（未計雪蟹箝時間）
價錢：$30/2人
材料：蟹箝2隻、芥辣2茶匙、魚露少許、蒜頭1粒
做法：先將蟹箝烚熟，放雪櫃冷凍備用；蒜頭切碎粒，混入芥辣魚露，拌勻成醬料。蟹箝拆肉蘸醬料食用。
蟹腳關節夠金黃
黃油蟹最平閒閒哋都要百幾蚊一隻，頂級的更有價有市；唔想俾人呃，最緊要自己識得揀。首先蟹身有光澤，蟹腳關節要帶金黃色，這樣的蟹才多油。千萬不要買斷肢的「傷殘蟹」，因會漏油。另外，蟹腳要結實、多肉，有肉才會長膏，若連肉都沒有的話，試問還何來膏和油呢？最後可揭起蟹厴，隆起的部位要飽滿，帶金黃色就為之足油靚貨嘞！
劈蟹保黃油4部曲
