陳奕迅（Eason）和楊千嬅前晚在觀塘出席新戲首映禮，二人互笠高帽。身為老闆的林建岳被問到女朋友Monica上周穿大肚裙見白龍王，是否再度懷孕，岳少即說：「着啲衫闊就似咩？好多唔係真，其實有啲裝胸作勢。」
由陳奕迅和楊千嬅主演的電影《每當變幻時》前晚在觀塘apm舉行首映禮，老闆林建岳、監製杜琪峯、導演羅永昌、演員鄭融和陳苑淇等都有出席。適逢羅永昌昨日生日，眾人前晚在首映禮上提早為他切蛋糕慶祝，而祝酒儀式則以果汁代酒。
「你夠着啲衫闊啦」
電影主題曲的原唱者薰妮前晚都有出席首映，她甫上台更站在主角陳奕迅前面，反而林建岳和杜琪峯則站在最後排。早前有雜誌拍到林建岳和女友陳浥萍（Monica）往泰國賀白龍王生日，Monica身穿闊身裙似再度懷孕，前晚問林建岳可有此事，他指着女記者說：「你夠着啲衫闊啦，着啲衫闊就似咩？好多唔係真，其實有啲裝胸作勢。」
另外，大會司儀問導演羅永昌為何揀選千嬅及Eason做男女主角時，他表示：「因為千嬅夠靚，而Eason夠麻甩佬。」繼《百分百感覺2》及《慳錢家族》再度合作的千嬅和Eason也互笠高帽，千嬅笑說：「今次見面覺得佢有成熟一面，唔好睇佢成日瘋瘋癲癲。」Eason也禮尚往來說：「佢都係儍儍哋，但演技就越來越進步。」
對於被導演指甚有麻甩佬感覺，Eason笑說：「麻甩就麻甩，佢係咪話我『麻甩好』？佢睇到我麻甩嗰方面，有好多都未發掘。」問他有甚麼未被發掘？他說：「例如俊俏！」提到被薰妮搶鏡，Eason表示：「吓？搶鏡，係我拉佢過嚟，佢幾靚，冇啲咁嘅事。」
千嬅買飛捧阿Sa
蔡卓妍（Sa）主演的《戲王之王》正好跟千嬅打對台，千嬅說：「我有買飛入戲院睇《戲》，詹sir做得出色，阿Sa就越嚟越放，自己學到好多嘢，不過我對自己部戲都好有信心。」
採訪：王連連
攝影：林德雄
