以亞洲區為集團發展龍頭嘅獅子錢莊滙豐，對高速增長嘅中國市場當然不敢怠慢，噚日集團主席葛霖就率領滙豐銀行一眾高層，飛去上海，聯袂新地老闆郭炳湘及郭炳江昆仲主持日後命名為「滙豐銀行大樓－上海國金中心」嘅動土奠基儀式。
呢座被視為滙豐中國旗艦物業嘅滙豐銀行大樓，佔上海國金中心兩座辦公樓嘅其中一座，係上海新地標，亦係獅子行新中國總部，獅子行進駐共20層，總面積約5萬3千平方米。座樓位處浦東新區世紀大道，盤踞陸家嘴金融商貿中心，正係丁財兩旺嘅甲級地段。
噚日出席嘅嘉賓，仲有上海金融服務辦公室副主任方星海、上海銀監局局長王華慶，而滙豐亞太主席鄭海泉同滙豐銀行執行董事王冬勝，都傍住葛霖主持動土禮，不過冬冬哥就行程緊密啲，跟手即飛返香港，出席今日舉行嘅人民幣發債儀式。