濕熱季節一到，一大堆蟲蟲蟻蟻即刻從不同角落標晒出嚟，有時好哋哋瞓個覺，起身發覺自己無情情俾嘢咬，真係麻煩。屋企有細路同寵物，噴化學殺蟲劑總係唔放心，卒之俾我在網上搵到傳聞中的滅蟲十兄弟，佢哋個個身懷絕技，點石成金，隨手執起個橙，都可以變做滅蟲小法寶。滅蟲十兄弟殺到，睇吓啲蛇蟲鼠蟻仲匿得去邊度！
記者：劉嘉蕙
攝影：陳盛臣、劉嘉蕙
Model：Algie（TheGroup）
鳴謝：快高清潔有限公司（26259603）、環力滅蟲服務公司（23526933）
哥士的：十兄弟來自孫中山年代
電視劇《緣來自有機》入面有個由陳錦鴻飾演嘅「哥士的」，對環保生活法好有心得，不過我哋搵番正牌「哥士的之父」曾Sir，佢話網上流傳的所謂「環保除蟲法」，好多都未必有效，「呢啲秘方係孫中山時代傳落嚟嘅，好多都係人云亦云，我唔敢講樣樣冇效，最緊要對症下藥，搞清楚先好試。」曾Sir仲話，環保滅蟲十招佢有好多未聽過，亦冇興趣試，「坊間流傳喺米缸入面放大蒜可以去穀牛，不過咁樣會搞到煮飯有陣蒜味。其實只要擺一塊亁淨毛巾，冚喺米缸面焗20分鐘，穀牛就會自己浮出嚟。」曾Sir仲提醒大家，夏天容易見到細細隻卜坭喺牆身爬來爬去，千祈唔好手多多揑死佢，因為卜坭屍體會釋放怪味，引來更多同伴埋身。
正所謂預防勝於治療，唔想下下用到化學滅蟲劑，曾Sir話平日最緊要保持家中空氣流通，譬如戒心急開冷氣習慣，「天氣雖然熱，但返屋企最好忍一忍，唔好立即開冷氣，要畀多啲新鮮空氣入屋，唔好吹來吹去都係同一批空氣，咁好易滋生細菌。」
滅蟲專家$400起
中文大學生物及化學系副教授陳竟明指出，這十個「環保除蟲法」可信度唔高，「如果呢啲民間智慧有效，化學殺蟲劑就唔會咁好賣啦！」陳教授話，好難仔細分析呢啲方法原理係乜，要防治蟲蟻最可靠都係得一個方法，「保持環境亁淨咪得囉！」
問番滅蟲專家Eric，佢話右列的環保除蟲法對付細規模蟲蟻可能Work，「煲醋、放大蒜應該都可以防蟲嘅，不過會搞到好大陣味。」如果蟲患失控，𠵱家好多專業除蟲公司都幫到手，一般500呎以下住宅除蟲一次收費約$400至$500，白蟻約$1,500。另外由於小強及螞蟻臨死前會爆蛋，所以要做起碼兩次，先可以完全杜絕蟻蟲。
網上傳聞十兄弟
蛋散大佬
傳聞絕技：驅蟻
傳聞方法：將蛋殼燒焦成粉末，撒於牆角或其他多螞蟻出沒處。
菜菜子二哥
傳聞絕技：驅蟻
傳聞方法：將韭菜折斷，放入糖罐中可驅蟻。
牛奶仔三佬
傳聞絕技：煉藥驅小強
傳聞方法：將1碗鮮奶混和1碗麵粉、2湯匙糖、一盒硼酸及少許洋葱攪勻，置於屋內小強出沒角落，一般有效期5至6個月。
橙皮紋四佬
傳聞絕技：做蚊香
傳聞方法：將橙皮曬亁，在室內點燃，可以趕走蟲蟻，並去除一室異味。
五佬花露水
傳聞絕技：除蚤驅蚊
傳聞方法：於被單、床褥等位置噴花露水可除蚤，另外於嬰兒車上輕灑花露水可驅蚊。
牙膏六哥
傳聞絕技：消腫止痛
傳聞方法：被蚊蟲咬傷後，於患處搽牙膏可去腫。
香蒜七哥
傳聞絕技：趕書蟲及花蟲
傳聞方法：
1.趕書蟲：大蒜榨汁塗於書籍上。
2.趕花蟲：拍扁大蒜，置於盆栽中。
呷醋八佬
傳聞絕技：殺菌消炎
傳聞方法：
1.殺菌：煮滾白醋，令成屋瀰漫醋味，可幫助殺菌。
2.消炎：被蚊叮蟲咬後，點醋於患處可消毒。
橡筋肚九佬
傳聞絕技：異味趕蟻
傳聞方法：螞蟻怕橡筋味道，將橡筋縛於枱腳或罐上可驅蟻。
辣椒仔十弟
傳聞絕技：製藥驅小強
傳聞方法：辣椒粉及胡椒粉以1:1混和，撒在廚房排水口或其他小強出沒處。
夏蟲出沒注意
蟲蟲繁殖快，一出現一發不可收拾，屋企平日有邊啲陰濕位最容易起蟲呢？即刻睇睇！
1.任何容易積水處，如廚房、廁所、魚缸底、窗台、所有漏水位都要留意。
2.有混棉物料家具，如梳化夾層
3.所有木製家具，如鞋櫃、衣櫃
4.床褥底、枕頭
5.盆栽
