收到幾位讀者來郵，叫左丁山回覆。女讀者話佢會移民加拿大，問直飛多倫多好，還是先飛溫哥華，再坐國內航機去多倫多，呢樣左丁山好矇吓，自己係大鄉里，咁耐只係去過溫哥華一次，多倫多兩次。因為香港飛多倫多與溫哥華係黃金航綫，機票甚貴，如果女讀者覺得肉赤，不妨提早上網訂廉價航機去溫哥華，假如你唔好彩，到時碰上誤點，唯有忍吓啦，聽講廉價航機都幾準時嘅！
三位讀者問睇GG細語先知道港大有個CrimsonExchangeProgame，已錯過咗報名，有冇其他類似課程可讀。又畀你哋考起，港大呢個課程冇乜宣傳，好多人唔知，錯過就錯過啦，可以等明年，或者請你哋打電話問吓港大。
讀呢類課程，學費二千六百元，唔貴咯。最近一位朋友知道樂施會有一個「扶貧學習計劃」，安排國際學校學生到中國貧窮農村體驗，學習如何扶貧，得到第一手中國經驗，事後會畀番一張沙紙（certificate）。呢張沙紙會有用㗎，到申請哈佛耶魯之時，可以寫埋出嚟，當作寶貴資源。可惜呢，呢張沙紙嘅價錢好貴好貴，樂施會要每一位送子女參加「扶貧學習計劃」嘅家長，籌得十二萬元贊助費。呢招相信係學自羅賓漢，劫富濟貧！啲大富人家梗係唔志在啦，例如唐英年，紅藝人又有辦法啫，如薛家燕就搵到唔少贊助。之不過，如果你係中產以上嘅家長，畀仔女讀國際學校，已經要捱昂貴學費咯，送個仔去學習扶貧，要搵贊助費十二萬元？諗吓都會肉痛，不如畀兩萬銀個細路，叫佢孭背囊去中國穿州過省，體驗生活好過。
同唐家、田家、郭家、馮家、羅家啲仔女做國際學校同學，正是人出雞，你出豉油都會喊窮，自己拎唔出，會累咗仔女產生自卑之心，更為不美。正因為咁，左丁山啲仔女係靠電腦派位入地區學校嘅，等佢哋自細知道乜嘢叫做比上不足，比下有餘吖嘛。