悠穎馳揸車好小心，超速、霸佔快線，甚至衝紅燈呢啲危險兼犯法嘢絕唔會做，所以我都好贊成政府喺繁忙路口加裝衝燈攝影機，捉晒班罔顧安全嘅駕駛者。
呢啲衝燈攝影機的確可以收到阻嚇作用，令大家見到交通燈黃燈亮起嗰陣，唔會再好似以前咁踩油衝過去；但掉番轉頭諗，會唔會反而變咗路上陷阱呢？
話說朋友A揸車去到北角渣華道粵華酒店，準備左轉上東廊去銅鑼灣之際，交通燈忽然轉黃，前車即刻踩Brake停車避免衝黃燈，朋友當然Dup埋一份，只差約5cm就撞到前面部車，尾隨嘅車亦爭啲炒埋嚟，合演串燒三兄弟！
我哋成日話內地交通落後，查實人哋一早有車用同行人用嘅交通燈倒數裝置，新加坡亦喺燈位前數百米加裝閃燈提示，反而香港車用交通燈就冇。希望有關當局考慮吓喺全港加裝呢類裝置，免得好心做壞事。
悠穎馳
豪邁不羈，愛車如命，聽幾下引擎聲就知咩車！