有雜誌指05年落選港男彭冠期日前喺林保怡母親嘅葬禮上，同保怡家人同親友表現熟絡，仲全程同保怡如影隨形，出力打點一切，甚至連保怡家人化寶燒祭品時都並排而立，直指兩男關係非比尋常，暗示二人斷背。
「星期五先答」
彭冠期噚日到油麻地宣傳有份演出嘅福音電影《真的戀愛了？》，見到記者影相時佢唧都唔笑，板起塊面，隨後記者上前要求訪問，彭冠期即刻問：「你邊位？邊間？」道明來意後，彭冠期即慌慌忙忙執袋話唔得閒要走人，仲話：「我星期五先答你，今日宣傳電影。」莫非要同保怡商量對策？
除咗彭冠期外，今次福音電影仲搵嚟李詩韻、歐倩怡、羅霖同洪欣演出，李詩韻話：「做呢行好易令人迷惘，自己好想搵一種信仰，我𠵱家只係好初期嘅信徒，有返過藝人之家，之前家人遇到啲事令我好擔心前路，好彩我都不斷有工作。」歐倩怡飾演等待戀愛嘅女人，佢大晒幸福話：「我婚前嘅戀愛道路冇乜空檔，今次角色可以尋回人生一部份。」
