上星期港股造好，全星期貼近22000點收市，有唔少散戶唔識驚，股市創完新高仲不斷高追。有「香港畢菲特」之稱嘅本港股神恒地主席四叔李兆基，上星期六已提醒投資者：「恒指上到22000點要因住，唔好揸咁多貨」，連四叔都將濕濕碎碎嘅股份沽售。有「民間股神」之稱嘅內地股神林園不約而同話，一年之內要減倉A股比例達三成。唔通中港股神都認為，兩地股市已出現泡沫，所以齊齊呼籲股民減磅？
話說上星期，民間股神林園出席《上海商報》一論壇，傳授投資心得畀投資者：投資毛利率穩定或趨升、冇競爭對手、產品單一、龍頭公司、發展前景一眼睇得清嘅上市公司，就係佢18年來創造從8000銀人仔滾到12億嘅關鍵所在，仲話買股票必須買未來3年升逾10倍嘅股票。
口風前言不對後語
𠵱家林園手持A股股票包括招行、貴州茅台、上海機場等廿幾隻股票，仲話呢啲股係滬深1400幾家上市公司最好嘅股票。佢又發表偉論，承認滬深股票存在嚴重泡沫。
林園自爆，由今年2月起已經開始減持A股股票，一年目標定咗要減倉30個巴仙，套現咗嘅錢，佢話會投向價格更抵嘅香港市場，同埋即將做IPO嘅內地企業。咦！內地股神嘅新投資策略同香港畢菲特四叔咁似嘅？四叔對有質素嘅新股都好有興趣，仲會落飛認購，例如內房股碧桂園同埋合景泰富都係四叔心水。
不過內地股神都幾飄忽，4月尾接受《證券時報》訪問時話，大市隨時可能大調整，當時佢嘅倉位依舊滿倉，同佢論壇上講嘅2月開始減持有出入喎。唔通佢受阿爺所託，出口術幫股市降溫？
[email protected]