曾特首喺星期六早上十一時宣佈三司十二局及特首辦主任名單，因名字早先在報紙曝光（或有特別權威人士一早洩露），所以並無驚喜。另外廉政專員由湯顯明接任，可謂冷手執個熱煎堆，本來佢在保安局時期，忠心為葉劉局長服務，葉劉因二十三條立法而下台，湯顯明先至調去做海關關長，做到退休就算，點知奇峯突出，羅范椒芬竟會碰上「教院門」，憤而提早退休，曾特首一時之間要人用，就援用舊例，以海關關長（李少光，黃鴻超以前都係咁啦）出任廉政專員。做官要講命，如果紫微楊有湯顯明嘅時辰八字，一定可以批中佢嘅升官圖。
早於宣佈前，議員L根據已知名單，就好正經咁同左丁山講：「嗱，呢個係好多年以來，政府最強勁嘅財金班子，直情係白金陣容，一望而知，以後特區政府最着緊搞好金融，打造超級曼哈頓。」何所見而云然呢？議員L話：「曾特首本人做過財政司，以前係工商系統，政務司司長唐英年啱啱做完財政司，以前做過工商局，財政司司長曾俊華做過貿易署，工商局！財經事務及庫務局局長陳家強係世界有名嘅財務學教授，商務及經濟發展局局長馬時亨曾係銀行家。上任財經事務及庫務局局長，仲有，特首辦主任陳德霖以前係金管局第二號人物，渣打銀行亞太區副主席。佢哋嘅財政經驗及金融管理經驗夠晒豐富，呢個財金陣容，前鋒後衞兼備，直情係白金陣容啦。」
不如再加埋發展局局長林鄭月娥。佢以前喺庫務局出身，甚至公務員事務局局長俞宗怡亦出自工商局系統，做過庫務局局長，一度有機會接替梁錦松做財政司司長㖭，呢兩位女士好「打得」，係財金勇將嚟㗎。
財金陣容咁強盛，政治民生陣容又點？弱啲喎，前者等於車路士嘅杜奧巴、泰利、林柏特；後者就等於胡禮菲臘斯，保羅費拉拿與舒夫真高等。我哋好難有乜嘢大期望，即係話政制發展一定冇經濟發展咁快，八十歲長者要有邵爵士咁健康，先至有望見到香港普選！