呢個世界真係成功冇僥倖，好似日本國腳中村俊輔前日29歲生日，都趕去參加國家隊嘅訓練備戰亞洲盃，反而有20名隊友為球會缺席首課訓練，認真唔似樣！
「壽星公」中村上季打咗成50場波，季尾仲要受傷，好在及時好番，趕得切月初為國出戰亞洲盃；前日（24日）29歲生日當天「落狗屎」，好應該留喺屋企同家人慶祝，不過呢位球星就話：「我都唔知仲有幾多次機會着住國家隊球衣過生日，我希望帶更多創意畀球隊。」
每日狂射100球
日本頭號球星嘅中村上個禮拜自己進行4課訓練，每日用亞洲盃專用波狂射100球自由球；之不過，中村嘅敬業似乎一啲都冇感染到其他隊友，好似前日球隊首課訓練嗰陣，30名初選名單之中，只有10人參加（其中兩人受傷冇操），其他20人選擇留喺球會。
我求大俠即時諗起前日本國寶中田英壽，舊年世界盃批評隊友態度散漫，睇嚟日本隊真係一蟹不如一蟹。由於日職聯上周仲有波打，教練奧禪已經好體諒球員，畀佢哋自己決定係咪參加訓練，勢估唔到最後咁多球員唔出現，搞到呢位66歲教練心都淡埋！
眾將缺練奧禪心淡
來自波斯尼亞嘅奧禪之前批評過球隊訓練好兒戲，日本隊嚟緊會進行3課訓練，然後7月4日飛去越南參加亞洲盃。我求大俠希望呢支衞冕隊可以盡快重拾鬥心，繼00、04年後連續3屆稱霸亞洲，千祈唔好白費中村一番愛國心呀！