大凌集團停牌逾三年，上個禮拜股壇名人大中華證券主席蕭炎坤，喺多份報章登廣告，以大凌小股東苦主身份，成立「大凌集團小股東權益關注組」，希望集合小股東力量，爭取大凌盡快復牌。
蕭炎坤噚日喺童軍中心開記招，有128名小股東參加，華華在場所見，佢哋以中年人士居多，唔知係咪因為大凌停牌前股價只係2.2仙、銀碼細蝕極有限，加上停牌逾三年，所以在場小股東異常冷靜，未有任何提問。
小股東黎女士會後表示，希望集合多人力量，畀壓力聯交所，既然准大凌上市集資，點解又唔畀佢復牌呢；佢友人仲話，話停牌就停牌，又冇交代原因，佢對呢個市場好失望。
翻查聯交所資料，大凌04年4月21日，因擬發供股通告而申請停牌，至今聯所亦冇解釋停牌三年嘅原因。即使蕭炎坤曾去信公司同聯交所上市科查詢，但兩者都以保密為由，冇詳細交代。
根據慣例，公司停牌逾三個月，聯所就考慮進入除牌程序，然後再分三個階段，每階段限半年；進入每個階段之前，都須經上市科考慮，所以除牌程序往往超出基本嘅一年半。目前為止，共有38間公司處於長期停牌，唔少早於04年開始停牌。
《壹週刊》上個禮拜報道，大凌幕後老闆「大凌張」張志誠，因為心急公司復牌，希望趁細價股熱潮未退，撈一筆快錢，所以搵嚟好友蕭炎坤代出頭，召集小股東，向聯所施壓，希望盡快復牌。
不過，噚日蕭炎坤對記者澄清，同大凌張只係商場上嘅朋友，絕對冇金錢或生意來往，今次登廣告、開記者會，無非係想復牌後，攞番自己啲錢，攞番公義，佢仲覺得，停牌機制存在漏洞，希望港交所主席夏佳理親自處理。
對於《壹週刊》話佢持有大凌約70萬股，蕭炎坤話，與事實不符，但唔肯透露自己實際揸幾多，只係話未夠需要公佈權益嘅5%。
蕭炎坤下一步係喺星期三登廣告要求復牌，又希望取得小股東授權，湊夠10%持股量，便即刻搵人入大凌董事局，睇住復牌進度。佢仲會拜訪大凌董事局同埋港交所上市科，深入了解點解復牌無期。
如果一個月後再冇進展，佢唔排除向證監會提出呢件事，總之就想盡快解決停牌呢個問題。
[email protected]