由今日起，港交所（388）嘅上市公司公告機制，將會進入一個新嘅里程碑。事關第一階段公告電子化「披露易」計劃將實施，日後但凡股價敏感通告（澄清通告除外），若果唔可以响前一晚11點，上載到港交所同埋公司自己網站，即使翌日九點前上載，都要最少停牌半日，甚至停足一日（視乎港交所上市科諸君認唔認為你要出埋個報紙通告提示），由於大家都係生手，安全起計，上個禮拜六，華華發現，港交所網站凌晨過後，竟然出現一個「壯觀」場面！
點解話「壯觀」呢？事關平日午晚12點過後，港交所個網已經冇咩新通告上載，但係上個禮拜六，竟然總共有19家公司齊齊上載重要性不同的公告，由更改地址到須予披露交易，甚至新股分配結果都有。既然大家咁乖，睇怕華華早排嘅憂慮，即係實施初期可能有好多公司未適應新機制，趕唔切上載通告而要停賽嘅情況，應該唔會發生。
[email protected]