德祥（372）上星期三公佈配股，德祥現價同每股伸手價差無幾，大孖沙冇肉食，德祥要昅實。德祥呢期配售達到3億股，相等已擴大股本13%，就算一般散戶，承接力有限。有理由相信，呢批貨應該落入強者手中。德祥現價（0.77元），只係相對伸手價0.74元高出4%，大孖沙肯定唔夠喉。又德祥呢次透過配股，集資兩億銀，連埋先前沽售部份錦興（275）權益，加埋手頭現金，同集團計劃出售保華（498）權益計，德祥現金將會達到16億銀，相等德祥已擴大股本後，每股現金0.74元，德祥儲備咁多銀彈，做乜？
再講，德祥投資有法，07年度中期（9月止）純利1.94億銀，已經超過06年全年度純利1億銀。就當07年度純利，都係維持半年度1.9億銀水位，德祥PE都係講緊7字頭。細價股炒到飛起，德祥仲係單位數PE，平得無理。以德祥10倍PE做目標，德祥都要升40%到1.08元。
隆成息高盈利穩定
隆成（1225）06年度（12月止）派息8仙，大增77%，息率上到7.8厘，呢期細價股有些少震盪，隆成高息，避風力特強。上年石油及金屬管價格相對穩定，隆成純利急升8倍到8620萬銀。今年以嚟，原料同能源價格亦keep住穩定，對隆成07年度純利穩定性，有好大幫助。就當隆成07年度純利輕微增長一成到9500萬銀，集團近8厘高息政策，應該冇走雞。以07年度10倍PE做目標，隆成要見1.3元，現價1元潛在回報30%。
錢雋