今年是香港回歸祖國10周年，在這10年間，香港人經歷了很多事情。93年學成回歸香港發展的阿詹，一起與港人走過這段歲月，對港人有了新的看法。
阿詹說：「老實講，我以前幾憎某啲香港人，佢哋太羊群心態，做乜都係一窩蜂。但回歸呢10年，我同香港人一齊經歷八萬五房屋政策、沙士慘痛事件、7.1大遊行同梁家傑參選特首之後，開始對香港人改觀，𠵱家啲香港人對政治已經冇咁冷感，清楚自己嘅權利同義務，開始明白可以有公民要求同選擇，對生活質素亦越來越注重，所以香港人嘅質素係提升咗，而我亦由唔鍾意轉化變成好關懷呢個國際都市。」
應該以民為本
阿詹並非只靠把口來關懷香港，縱使他要養起劇團30幾人，一時要去拍戲、演話劇、拍廣告和開班授徒等，絕對是百分百的大忙人，但他還是身體力行推動本地文化藝術，去年開始，阿詹抽出空檔，獲政府委任為西九龍文娛藝術區核心文化藝術設施諮詢委員會成員，致力提升香港的文化藝術。
阿詹說：「當你對一個地方越來越有歸屬感時，當然好想幫呢個城市做啲嘢，我同政府官員就西九文化嘅事開過幾次會，發現佢哋班官諗法好錯，佢哋着眼點都係以西九去幫助旅遊業，同我哋真係想推動文化藝術嘅方向好有出入，不過我希望可以說服呢班有權力人士聽吓我講。政府係使緊納稅人錢，係咪一切先以市民為本呢？」
從阿詹的舞台劇或棟篤笑，不時會看到他以幽默抵死的對白來嘲諷政府，但他的劇團部份經費卻來自藝術發展局的資助。他說：「政府啲錢點嚟㗎？咪係用緊納稅人嘅錢，咁我搞話劇都係娛樂大眾，咁話劇做乜題材，梗係先照顧觀眾口味，做到可以雅俗共賞，以前我未諗通，搞嘅舞台劇唔夠普及化，賣座情況麻麻，後來04年喺日本公演完《兩條老柴玩遊戲》，反應出奇咁好，海外評論家譽為世界級嘅製作，我喺日本返嚟之後真係諗通咗，應該將舞台劇普及，吸引更多平時唔會睇舞台劇嘅觀眾入場，連阿叔、阿伯都會嚟睇，以《男人之虎》嘅入場人次，我相信𠵱家走嘅方向係啱嘅！」
搞舞台劇辛苦
不過阿詹沒有被利字沖昏頭腦，他不會忘記當年搞話劇團，自導自演一個話劇，每個月只得15,000元收入的歲月，因為不夠開銷，夜間還要教學賺取外快來維持，這段艱難歲月總算熬過去。他認為今日的成功，只是一個開始，往後最重要是如何保持觀眾入場人次的增長。
阿詹說：「喺香港搞舞台劇其實係幾辛苦，要keep住觀眾增長就更加唔容易，不過我搞舞台劇係堅持一個信念，就係要帶快樂畀觀眾，令更多觀眾喜歡藝術文化。」