馮仁昭四圍超：
陳茵媺失禮食螺絲　細契回歸騷攞晒彩 - 馮仁昭

關菊英喺電視劇《溏心風暴》裏面做細契王秀琴，奸到出汁嘅演技備受讚賞，人氣勁旺嘅佢，喺嚟緊嘅八月會舉行兩場紅館個唱，前晚佢又喺紅館為《香港各界婦女慶祝回歸十周年》獻唱《講不出聲》，現場觀眾大多係婦女，一聽到呢首歌，掌聲雷動之外，唔少《溏心》fans仲大叫「細契，支持你呀，加油呀！」搞到關菊英嘅風頭蓋過何韻詩、關心妍同泳兒等一班歌手，成為最受歡迎嘉賓。

未知黎嬰情況

細契攞彩，一班美貌與智慧並重嘅香港小姐就甩晒鬚，陳茵媺繼之前做兒歌金曲司儀後，前晚第二次做節目司儀，拍住鄭裕玲同鄧梓峰兩位前輩，唔知係咪太緊張，陳茵媺不停食螺絲，又講錯說話，做咗個唔合格嘅司儀，另外一班港姐，包括袁彌明、戚黛黛、林莉、陸詩韻同黃瑩等合唱《我的驕傲》時咪嘴演出，好彩啲觀眾都有禮儀地拍掌鼓勵。
此外，大會前晚頒發和諧家庭獎畀十個家庭，黎萱係得獎者之一，佢話自己啱啱喺加拿大返港，睇報紙先知姪仔黎嬰出意外，但就仲未去醫院探病，佢話對黎嬰嘅情況唔了解，十問九唔答。