互聯網嘅威力真係越嚟越驚人，尤其係佢嘅號召力，開心媽咪Danise近排喺親子網上面參加咗個買奶粉行動，正好說明如果能善用互聯網嘅凝聚力，可以發揮到很大的經濟效益。
話說，有間公司喺某個親子討論區發起，如果可以喺3日裏面湊夠某一個數量嘅人，一齊訂購日本奶粉，就可以用全城至低價買到。
令供應商無可抗拒
如果零售商可以喺短時間集合到大班買家，訂購一定數量嘅貨，喺批發商面前嘅議價能力自然增加。同理，一般消費者都可以透過集結力量，增加自己嘅議價能力，互聯網正好係集結力量最方便嘅途徑。
最近有間保險公司推出咗一隻醫療保險產品，簡單嚟講係一隻副線產品，賣點係平，可以補足公司醫療保險嘅不足，敏妮睇過啲條款都覺得OK，不過，本身已經買咗醫療保險，冇需要再買，但光頭仔同其他幾個同事都話有興趣。
Danise嘗試集結呢股購買力，睇吓可唔可以迫到保險公司提供一個特別折扣。初步反應係可以，但實際折扣係幾多，保險公司就要計一計數。
敏妮認為，保險公司唔即刻接受，係因為Danise嘅議價力仲未達到令保險公司無可抗拒嘅地步，所以建議佢不妨再發大啲。不過，始終買保險唔同買奶粉，所以透過網上討論區集結力量並唔可行，但公司規模都唔少，敏妮就建議Danise喺公司嘅內聯網，問吓其他部門同事有冇興趣，始終大家同一間公司，叫個保險agent嚟一次過介紹吓，安排都方便啲。
用互聯網增號召力
早排，敏妮睇過一則大陸新聞，話有批大陸網民經常搞啲主題展銷拍賣會，由於討論區有幾千個會員，號召力夠強，所以供應商都會應邀攞產品去賣，而班會員事前都會喺網上面協議咗個拍賣價上限，會員違規就取消資格，所以佢哋每次都可以用低過市價買到心頭好。
對啲供應商嚟講，雖然擺明俾人壓價，但由於面對嘅全部係有心買嘢嘅買家，相對銷售成本自然減咗。
資產增值由小做起
細細個都學過團結就係力量，要幫你手上面嘅錢增值，除咗拎去投資，善於運用，同一嚿錢發揮嘅力量，可以好唔同。