中央一聲話，再開水喉，放寬QDII嘅投資範圍，未正式收到大禮，港股已經炒到飛起，雖然個個股民都唔執輸，爭住入市，但大家心底都好想知道，內地喺呢方面究竟搞成點？反應係咪會好熱烈？
華華上內地網睇過，呢排都有唔少關於QDII文章，有啲話，粗略估計，能滿足中證監要求嘅基金同證券公司，唔夠20間，相比𠵱家市場嘅58間基金同百幾間證券公司，比例好細。
據講，好似中信同光大等券商，已經積極準備資料同文件，到7月5日一實施即申請。咁當然會諗埋有啲乜嘢產品推出啦。另外，內地意見指，雖然擴大QDII，有助投資者分散風險，但初期規模唔大，對分流A股資金，作用有限，即係未必做到中央希望，令股市降溫嘅目的。同時，因為攞到QDII資格嘅公司，可以增加海外市場操作經驗，有利壯大發展，結果令到基金公司之間分化。
對於一般老百姓嚟講，又點睇呢？原來意見都幾分歧，有啲話，海外股市抵買過A股，梗係值得投資啦：有啲就希望睇定至算。至於一啲堅決唔幫襯嘅，仲好理性咁分析話，人民幣一路咁升值，去海外投資咪會有貶值嘅危機囉。
睇嚟，𠵱家內地QDII都未有好清晰嘅嘢畀大家睇到，香港股民究竟係咪繼續瞓身大炒特炒，要諗清諗楚至得。
[email protected]